Urad bačyć metazhodnaść realizacyi prajekta, nakiravanaha na madernizacyju Aršanskaha instrumientalnaha zavoda. Pra heta havorycca ŭ paviedamleńni pres-słužby Saŭmina, piša Tut.by.
Kampanijaj raspracavany prajekt «Madernizacyja AAT «Aršanski instrumientalny zavod» z ukaranieńniem novych technałahičnych pracesaŭ vytvorčaści mietałareznaha i dapamožnaha instrumienta». Biznes-płan ciapier prachodzić uzhadnieńnie ŭ Minpramie. Praduhledžvajecca budaŭnictva novaha vytvorčaha korpusa i zakupka abstalavańnia ahulnym koštam kala 36 młn dalaraŭ. Usie vydatki na realizacyju prajekta składuć 62,57 młn dalaraŭ.
«Ciapier razhladajecca pytańnie, jakim čynam pravilna strukturavać prapanavany pradpryjemstvam inavacyjny prajekt. Madernizacyja zavoda maje svaje ryzyki, bo nie chaciełasia b paŭtarać situacyju z drevaapracoŭkaj. Ź inšaha boku, jość kalektyŭ. Heta samy vialiki nabytak — kadry, ich žadańnie, navyki i dośvied. Tamu budziem razhladać prajekt na bližejšym pasiadžeńni ŭrada. I z ulikam dośviedu madernizacyi, jaki my ŭžo majem, finansavych mahčymaściaŭ, vypracujem aptymalny varyjant», — skazaŭ premjer-ministr Andrej Kabiakoŭ.
Jon bačyć i ekanamičnyja pierśpiektyvy zavoda. Pa jaho słovach, jość «vialiki rasijski rynak, a taksama ŭnutrany». «Kala 30 młn dalaraŭ — heta abjom štohadovaha impartu režučaha instrumienta ŭ Biełaruś, anałahičnaha tamu, što vyrablaje aršanski zavod. Ale ŭzrovień abstalavańnia i enierhazatrat robić jaho pradukcyju sastarełaj i niekankurentazdolnaj», — adznačyŭ Kabiakoŭ.
Składzieny biznes-płan uklučaje zasvajeńnie i vypusk 400 vidaŭ novych kanstrukcyj instrumienta na ŭzroŭni jeŭrapiejskich anałahaŭ z vysokaj kankurentazdolnaściu na rynkach Biełarusi, krain SND i inšych. Tamu realizacyja prajekta — heta šlach da źnižeńnia impartu biełaruskimi spažyŭcami i pavieličeńnia ekspartu vysokatechnałahičnaha instrumienta. «Takim čynam, zavod, što niemałavažna, budzie zabiaśpiečvać i zaniataść, stvarać pracoŭnyja miescy na bolš vysokim technałahičnym uzroŭni», — dadaŭ Kabiakoŭ.
Siońnia Aršanski instrumientalny zavod utrymlivajecca ad bankructva za košt ekspartu ŭ Rasiju, bo realizacyja pradukcyi na ŭnutranym rynku nie prynosić abarotnych srodkaŭ. Rachunki kampanii aryštavanyja z-za praterminavanaj kredytorskaj zapazyčanaści. Hetaje pytańnie pradpryjemstva sprabuje vyrašyć z 2015 hoda paralelna z raspracoŭkaj biznes-płana madernizacyi i raźličvaje na spryjalnaje rašeńnie i padtrymku na samym vysokim uzroŭni, havorycca ŭ paviedamleńni pres-słužby ŭrada.
Padčas niadaŭniaha pasłańnia parłamientu i biełaruskamu narodu Alaksandr Łukašenka prapanavaŭ akazać padtrymku aršanskamu zavodu. «Čamu pracuje drenna pradpryjemstva? My prosta im nikoli nie zajmalisia, jano ž nie ŭ Minsku znachodzicca, — skazaŭ Łukašenka. — Jana tam daloka, na ŭskrainie, tam, možna padumać, nie našy ludzi žyvuć. Niekatoryja prapanujuć abviaścić jaho bankrutam i zaŭtra zakryć. Refarmatary rajać pieravučyć ludziej. Heta vysakakłasnyja śpiecyjalisty, jakija robiać toj tavar, jaki patrebny našamu narodu. My ich chočam pieravučyć šyć anučy. Jaki vychad? Treba madernizavać pradpryjemstva. Tam jość ludzi i jość pamiaškańni. Treba kupić novaje abstalavańnie, novyja stanki, i vyjdzie niadoraha, kali nie buduć brać adkaty i chabary. I ludzi vyrabiać tavar. A to atrymajecca, my ludziej pieravučym šyć anučy, a toje, što treba našamu mašynabudavańniu, budziem zavozić z-za miažy».
