Mužčynu, jaki źniaŭ štany padčas vystupu Džamały na finale «Jeŭrabačańnie-2017» u Kijevie, zatrymała palicyja. Pra heta paviedamiŭ kiraŭnik MUS Ukrainy Arsien Avakaŭ na svajoj staroncy ŭ Facebook.
U toj momant, kali Džamała vystupała, jak minułahodniaja pieramožca, na finale konkursu, na scenu vyjšaŭ mužčyna ŭ ściahu Aŭstralii i źniaŭ štany. Jak akazałasia, heta ŭkrainski prankier Vital Siadziuk.
Sam Siadziuk patłumačyŭ svoj učynak asabistym chobi, bo «nieaficyjna pracuje pravakacyjnym žurnalistam», paviedamiŭ Avakaŭ. Kiraŭnik MUS adznačyŭ, što Siadziuk byŭ zatrymany achovaj konkursu pry ŭdziele palicyi. Jon, pa słovach Avakava, «akazvaŭ supraciŭ pry zatrymańni».
«U paradku art.208 KPK Ukrainy zatrymany na 72 hadziny da suda, jaki abiare jamu zaŭtra mieru strymańnia pa artykule 296 č.3 (chulihanstva z abciažajučymi) — ad štrafu da piaci hadoŭ pazbaŭleńnia voli», — napisaŭ Avakaŭ.
Kiraŭnik MUS taksama nazvaŭ Siedziuka «hańbaj krainy», dadaŭšy, što jon «zmoža realizoŭvać svajo chobi ŭ turemnaj kamiery izalatara časovaha ŭtrymańnia».
