17 maja 2017 hoda ŭ 17-30 u kinazale Biełaruskaha dziaržaŭnaha muzieja historyi Vialikaj Ajčynnaj vajny adbudziecca viečar pamiaci žaŭnieraŭ Druhoha polskaha korpusa ź Biełarusi, jakija ŭdzielničali ŭ vyzvaleńni Italii ad nacystaŭ.
Mierapryjemstva arhanizavana Ambasadaj Polščy ŭ Minsku, Biełaruskim dziaržaŭnym muziejem historyi Vialikaj Ajčynnaj vajny i historykam Iharam Mielnikavym. U jaho ramkach adbudziecca prezientacyja knih «Zabytyja hieroi» i «Adysieja palešuka» (aŭtar — Ihar Mielnikaŭ). Nahadajem, pieršaja ź ich raskazvaje pra losy biełaruskich andersaŭcaŭ, a taksama žaŭnieraŭ Pieršaj polskaj niezaležnaj pavietrana-desantnaj bryhady, jakija ŭvosień 1944 hoda vyzvalali Hałandyju ad nacystaŭ. Druhaja — heta ŭnikalnyja ŭspaminy biełarusa, žaŭniera 3-j karpackaj strałkovaj dyvizii Paŭła Ničyparuka, jaki zmahaŭsia suprać nacystamiŭ bitvie pad Monte-Kasina, a taksama la Bałonii i Ankony.
Akramia hetaha ŭ ramkach viečara pamiaci budzie pakazany dakumientalny film «Doŭhi šlach da domu», vytvorčaści Majsterni Uładzimira Bokuna. Stužka raskazvaje pra ciažki los biełaruskaha andersaŭca Jakuba Konana.
«Letać u Biełaruskim dziaržaŭnym muziei historyi Vialikaj Ajčynnaj vajny była vystava, pryśviečanaja historyi słužby biełarusaŭ u Druhim polskim korpusie. Zaraz u nas jość čarhovaja vydatnaja mahčymaść uzhadać hetych žaŭnieraŭ svabody. Hości viečaryny ŭbačać aŭtentyčnuju uniformu i ryštunak bajcoŭ 5-j kresovaj piachotnaj dyvizii. Jaje žaŭniery adznačylisia asablivym hieraizmam padčas bitvy pad Monte-Kasina. Akramia hetaha, buduć prademanstravanyja cikavyja artefakty, źviazanyja sa słužbaj biełarusaŭ u Armii Andersa. Narešcie, kožny žadajučy, zmoža papoŭnić svaju chatniuju biblijateku knihami «Zabytyja hieroi» i «Adysieja palešuka». Darečy, heta ŭžo apošnija asobniki», - adznačaje adzin z arhanizataraŭ mierapryjemstva Ihar Mielnikaŭ.
