Jak stała viadoma «Našaj Nivie», u Biełarusi pašyrajecca novy vid razvodaŭ ź sieryi «pravierki vady» — pamiatajecie, heta kali tysiačy davierlivych ludziej pavialisia na nibyta «dyjahnastavanyja» machlarami prablemy i za šalonyja hrošy kupili zvyčajnyja filtry dla kranaŭ.
Paśla była jašče «pravierka voknaŭ» z toj ža sieryi.
I voś ciapier novaja schiema — ašukancy abzvońvajuć kvatery z prapanovaj pravieryć kampjutar.
Pryčyna sfarmulavana hruvastka i lohka moža ŭvieści ŭ zman nieabaznanaha ŭ technicy čałavieka:
hołas u trubcy kaža, što ŭ dom nieŭzabavie budzie prakładzienaje optavałakno (sučasny kabiel, praź jaki internet robicca ŭ razy šparčejšym) i dla taho, maŭlaŭ, kab pry padklučeńni optavałakna nie było nijakich pierahrevaŭ dy zbojaŭ, treba pravodzić pravierku techniki. Kažuć, što «usio ŭzhodniena z harvykankamam» i «pravierka — ahulnaharadskaja».
Kali čałaviek pahadžajecca i prymaje vizit «śpiecyjalistaŭ», to prezientabielna apranuty maładzion-«prahramist» zavalvaje techničnymi frazami i pierakonvaje achviaru, što i taja detal kamputara ledź dychaje, i hetaja praź miesiac pieraharyć, dyj uvohule — sučasnyja internet-sistemy ŭžo nie zmohuć spałučacca z takoj «sastarełaj» ci «niaspraŭnaj» technikaj.
Takim čynam, čałavieka schilajuć da darahoha ramontu, u jakim niama patreby — nasamreč optavałakno nie moža vyklikać prablem z technikaj.
Viadoma, što «ramont» mohuć vykanać adrazu na miescy, navat kali ŭ niebaraki nie budzie ŭsioj patrebnaj sumy — apłata raściahniecca pavodle padpisanaha kantraktu.
Budźcie pilnymi — jak pakazvaje dośvied inšych, viarnuć hrošy i asprečyć punkty padpisanaha kantraktu nadzvyčaj składana.