Były deputat Maryja Maksakava, udava byłoha deputata Dziarždumy Dzianisa Varanienkava, dała intervju ŭkrainskamu telekanału ZIK. U im jana raspaviała pra toje, što napiaredadni zabojstva Varanienkava supracoŭniki FSB vykrali z terytoryi Biełarusi ich kiroŭcu. Jana taksama źviarnułasia da kiraŭnika Biełarusi Alaksandra Łukašenki z prośbaj pravieści rasśledavańnie.
«Jedzie naš kiroŭca napiaredadni, pierasiakaje miažu Biełarusi… Na błokpoście Homiela spyniajuć kiroŭcu i tudy vyklikajucca nibyta pamiežniki. A na samaj spravie pryjazdžaje dva aŭtobusy z efesbešnikami, našaha kiroŭcu kraduć. Možna źviarnucca ŭ efiry da prezidenta Łukašenki i paprasić, ja navat dam ŭsie źviestki — chto hetyja ludzi, proźviščy nazavu, chto heta zrabiŭ. Jany zachapili čałavieka z terytoryi Biełarusi i kanvairavali ŭ Branskuju vobłaść, tam jaho dapytvali na praciahu 12 hadzin, pazbavili suviazi, nie karmili, nie davali spać, zadavali mnostva pytańniaŭ», — zajaviła Maksakava <…> — Jany z terytoryi inšaj dziaržavy kraduć kiroŭcu. Chtości budzie rasśledavać ź biełarusaŭ, jak heta adbyvajecca ŭ ich?» — skazała Maksakava.
Byłoha deputata Dziarždumy Dzianisa Varanienkava zabili 23 sakavika ŭ centry Kijeva. Rasśledavańniem spravy ab jaho zabojstvie zanialisia pravaachoŭnyja orhany va Ukrainie i ŭ Rasii. Pakul viersij ab jaho zabojstva nia vyłučałasia.
U listapadzie minułaha hoda jon razam z žonkaj Maryjaj Maksakavaj źbieh z Rasii va Ukrainu. U śniežni jon atrymaŭ ukrainskaje hramadzianstva i paćvierdziŭ, što daŭ pakazańni pa spravie byłoha prezidenta Ukrainy Viktara Janukoviča. Akramia taho, jon raspavioŭ, što pamočnik prezidenta Uładzisłaŭ Surkoŭ byŭ suprać dałučeńnia Kryma da Rasii.
