Ministr unutranych spravaŭ Ihar Šunievič parazmaŭlaŭ z žurnalistami napiaredadni sumiesnaha pasiadžeńnia abiedźviuch pałat parłamienta. Varta adznačyć, što, u adroźnieńnie ad mnohich inšych čynoŭnikaŭ, Šunievič nie ŭchilajecca ad dyktafonaŭ i hatovy adkazvać na samyja niepryjemnyja pytańni.
«Dziejańni supracoŭnika milicyi ŭ mietro byli paśladoŭnyja, zakonnyja»
Hučny vypadak apošniaha času — zatrymańnie ŭ mietro chłopca siłavikami.
«Na žal, apošnim časam zdarajecca ŭsio čaściej i čaściej, što supracoŭniki orhanaŭ unutranych spravaŭ akazvajucca ŭ situacyi, kali im akazvajuć aktyŭnaje niepadparadkavańnie. U dadzienym vypadku heta byŭ typovy varyjant, kali čałaviek byŭ pad uździejanńniem ałkaholnaha i narkatyčnaha apjanieńnia. Chaciełasia b, kab takija vypadki zdaralisia ŭsio radziej. Dziejańni supracoŭnika milicyi byli paśladoŭnyja, zakonnyja. Jon vykanaŭ zadaču — zatrymać hetaha hramadzianina».
«Adzin mienšy džentlmien, druhi — bolšy»
Pres-sakratar MUS Kanstancin Šalkievič dazvoliŭ sabie vostruju pierapałku ŭ fejsbuku z błohieram Antonam Matolkam. Ci maje prava dziaržsłužačy tak pavodzicca ŭ sacyjalnych sietkach?
«Nijakich chamskich i niekarektnych zajavaŭ pres-sakratar MUS Kanstancin Šalkievič sabie nie dazvoliŭ. Heta vašy interpretacyi. Jon narmalna adkazaŭ, pa-ludsku, narmalnaj movaj. Razmova dvuch džentlmienaŭ. Adzin mienšy džentlmien, druhi — bolšy, ja maju na ŭvazie svajho. Nijakaha raźbiralnictva nie budzie», — adkazaŭ Ihar Šunievič.
Hałosnaść — heta śviadomaja palityka MUS
Uvohule, apošnim časam vyrasła kolkaść vypadkaŭ, dzie supracoŭniki milicyi vyhladajuć nie ŭ samym pryvabnym śviatle.
«My nie aceńvajem situacyju jak niešta niezvyčajnaje. Prosta źmianili svajo staŭleńnie da hałosnaści. Zhadziciesia, što pra niekatoryja vypadki, jakija my ahučvajem, jašče niekalki hadoŭ nazad nie mahło być i havorki. Raniej viedamstva było vielmi zakrytaje, i śmiećcie z chaty nie vynosiła. My ličym heta niapravilnym i kožny taki vypadak apubličvajem. Heta svojeasablivaja prafiłaktyka. Tendencyja na hałosnaść i vyjaŭleńnie takich vypadkaŭ — heta śviadomaja palityka Ministerstva ŭnutranych spravaŭ. Kožnyja vychadnyja my pravodzim rejdy pa vyjaŭleńni parušalnikaŭ zakona i dyscypliny siarod supracoŭnikaŭ MUS. Pravodzim u vychadnyja, bo ŭ hetyja dni spakusy bolš», — miarkuje ministr.
Kryčaŭskija milicyjanty parušyli ŭnutranuju karparatyŭnuju etyku
Rezanansny vypadak byŭ u Kryčavie, kali adčajnyja miascovyja milicyjanty źviarnulisia ŭ niezaležnyja ŚMI, u vyniku čaho byli zvolnienyja z pracy.
«Jany parušyli ŭnutranyja instrukcyi MUS, unutranuju karparatyŭnuju etyku. Takija supracoŭniki nie buduć pracavać u milicyi. Ja maju na ŭvazie nie tolki kryčaŭskich milicyjanieraŭ», — adkazaŭ Šunievič.
