Z 15 červienia ŭnutry Jeŭrasajuza całkam admieniena płata za roŭminh. Ciapier dla hramadzian ES suviaź u inšych krainach budzie kaštavać stolki ž, kolki i ŭ «chatniaha apieratara». Pra heta paviedamlaje Jeŭrakamisija na svaim sajcie.
Dadatkovyja zbory pierastanuć dziejničać dla ŭsich typaŭ suviazi — internet-trafiku, zvankoŭ i SMS-paviedamleńniaŭ. Karystacca suviaźziu apieratara ź inšaj krainy možna budzie ŭ miežach palityki sumlennaha vykarystańnia.
Dla samych aktyŭnych padarožnikaŭ, jakija pravodziać za miažoj bolš za čatyry miesiacy, apieratary buduć zapytvać dadatkovuju infarmacyju ab pierasoŭvańniach i mohuć pryznačać dadatkovyja dapłaty.
Kiraŭnik Jeŭrakamisii Žan-Kłod Junkier nazvaŭ hetaje rašeńnie «adnym z samych vialikich i adčuvalnych pośpiechaŭ ES». Na admovu ad zboraŭ spatrebiłasia dziesiać hadoŭ pracy roznych viedamstvaŭ. Paśla pryniaćcia rašeńnia ŭ mabilnych apierataraŭ było dva hady na toje, kab padrychtavacca da kanca roŭminhavych zboraŭ.
Darečy, Jeŭrazijskaja ekanamičnaja kamisija taksama pačała pracu nad admienaj roŭminhu dla zvankoŭ pamiž Biełaruśsiu, Rasijaj, Kazachstanam, Armienijaj i Kyrhyzstanam. U 2015 hodzie baki skłali płan pastupovaha źnižeńnia maksimalnych cen na zvanki za miažoj. Dla 2016 maksimum ustalavany na 0,68 jeŭra, u 2017-m - 0,3 jeŭra za chvilinu.
