Libieralny ruch prezidenta Makrona zdabyŭ pierakanaŭčuju bolšaść u Nacyjanalnym schodzie, sacyjalisty pieražyli razhrom, a antyjeŭrapiejski Nacyjanalny front adkinuty ŭ hłuchi kut. Taki vynik prynieśli parłamienckija vybary ŭ Francyi.
Ź cikavostak: na vostravie Korsika ŭpieršyniu pieramahli kandydaty ad nacyjanalnaj kaalicyi Pè a Corsica (pa-karsikansku heta aznačaje «Dla Korsiki»). Partyja ŭjaŭlaje saboj kaalicyju niezaležnikaŭ i aŭtanamistaŭ. Na čale jaje staić mer horada Bastyja.
Na apošnich rehijanalnych vybarach Pè a Corsica zdabyła 25% hałasoŭ. A ŭčora kandydaty kaalicyi pieramahli ŭ troch z čatyroch akruhach vostrava.
Zhodna z apytańniami hramadskaj dumki, za niezaležnaść vostrava vystupaje mienš za 15% žycharoŭ, ale prykładna pałova choča bolšaj aŭtanomii.
Francyja zachapiła Korsiku ŭ 1769 hodzie. U 1970—2010-ch Front nacyjanalnaha vyzvaleńnia Korsiki ažyćciaviŭ šerah teraktaŭ z patrabavańniem niezaležnaści dla vostrava.
Na Korsicy žyvie 330 tysiač čałaviek. Isnuje asobnaja karsikanskaja mova, ale jana amal źnikła z užytku.