Historyk Alaksandr Hronski vystupiŭ z artykułam «Ruski śviet u biełaruskim dyskursie». Dakład byŭ padrychtavany dla navukovaj kanfierencyi «Ruski źjezd», jakaja adbyłasia 1 červienia ŭ Sankt-Pieciarburzie.
«Aficyjnaja ŭłada razumieje termin «ruski śviet» dosyć hnutka. Adbyvajecca heta, mabyć, pa całkam ideałahičnych pryčynach, źviazanym z ekanamičnym, palityčnym i inšym uzajemadziejańniem Biełarusi z Rasijaj i z prablemami, jakija ŭźnikajuć u chodzie hetaha ŭzajemadziejańnia», — kaža Hronski.
Dalej historyk pryvodzić mnostva cytat Alaksandra Łukašenki, dzie toj spačatku kaža, što Biełaruś naležyć da «ruskaha śvietu», a paśla abviarhaje «ruski śviet — heta nie pra nas» i naadvarot.
«Biełaruskaja apazicyja, a taksama arhanizacyi i asoby, jakija padzialajuć jaje pierakanańni, staviacca da «ruskaha śvietu» adnaznačna niehatyŭna. «Ruski śviet» ujaŭlajecca čymści varožym».
Cikava, što historyk krytykuje «ruskich suajčyńnikaŭ» u Biełarusi, nizka aceńvajučy ich intelektualny ŭzrovień, a taksama pradstaŭnikoŭ pasolstva Rasii ŭ Biełarusi. Naprykład, pasoł Surykaŭ nie znajšoŭsia, što adkazać Łukašenku, kali toj spytaŭsia, što takoje «ruski śviet».
«Ideja «ruskaha śvietu» ŭ Biełarusi padzialajecca bolšaściu nasielnictva ŭ siłu cyvilizacyjna-kulturnaj prynaležnaści, ale hetaja prynaležnaść nastolki naturalnaja, što nie atrymała niejkaj nazvy. Ale prykmiety «ruskaha śvietu» (ruskamoŭje, cikavaść da Rasiei, abviaščeńnie siabie pravasłaŭnymi, prynaležnaść da ruskaj kultury i h.d.) nazirajucca paŭsiudna. Biełaruskija ŭłady razhladajuć ideju «ruskaha śvietu» jak niejki prajekt, u dačynieńni da jakoha ŭłady jašče nie vyznačylisia», — padsumoŭvaje Hronski.
Kandydat histaryčnych navuk Alaksandr Hronski pracuje vykładčykam u BDUIR. Darečy, tamsama vykładaŭ Juryj Paŭłaviec, zatrymany letaś za biełarusafobskija artykuły na čarnasocienskich rasijskich sajtach. Hronski — baraćbit za histaryčnuju reabilitacyju padaŭlalnikaŭ paŭstańnia 1863—1864 hadoŭ u Biełarusi i za adnaŭleńnie pomnika caru Alaksandru II u Minsku.
