Rasiejskaje ahienctva Regnum vydała interviju z nobeleŭskaj laŭreatkaj Śviatłanaj Aleksijevič, jakoje jana zabaraniła drukavać. Pa słovach piśmieńnicy, intervijuer pavodziŭ siabie nie jak žurnalist, a jak prapahandyst.
Da taho ž jana śćviardžaje, što davała zhodu na hutarku z pradstaŭnikom vydańnia «Diełovoj Pietierburh» i ciapier maje vyśvietlić, jakim čynam tekst apynuŭsia na čarnasociennym resursie.
Śviatłana Aleksijevič razmazała žurnalista «Rehnuma» ŭ vielmi žorstkim intervju
Svaboda źviazałasia sa Śviatłanaj Aleksijevič, kab vyśvietlić akaličnaści sytuacyi.
«Jak tolki hety žurnalist zadaŭ mnie try-čatyry pieršyja pytańni, ja skazała, što admaŭlajusia na ich adkazvać i zabaraniaju drukavać, — tłumačyć surazmoŭnica. — I svajho litaraturnaha ahienta, jaki prapanavaŭ interviju i arhanizavaŭ sustreču, papiaredziła, kab zatelefanavali i papiaredzili kiraŭnictva. Reč u tym, što ja pabačyła jahonuju ad pačatku ahresiŭnuju skiravanaść. Kali adrazu jašče zdavałasia, što možna pra štości spračacca, to paśla pytańnia — čamu vy abaraniajecie ŭkrainskich bandytaŭ — usio stała zrazumieła. A pakolki takich ludziej ni ŭ čym nie pierakanaješ, to ja ad kantaktavańnia admoviłasia».
Jakich zachadaŭ z boku nobeleŭskaj laŭreatki varta čakać u hetaj sytuacyi? Ci realna, što sprava moža dajści da sudu?
«Naturalna, ja budu źviazvacca z arhanizatarami hutarki, budu raicca sa svaim litaraturnym ahientam Saładoŭnikavym. Na žal, nia vieru, što ŭ hetaj sytuacyi niešta možna zrabić… Zasmučaje tolki toje, što heta absalutna małady čałaviek — čamu ja i spadziavałasia, što paśla pieršych replikaŭ jašče možna budzie vyrulić na sapraŭdy plonnuju dyskusiju. Ale toj vypadak, kali ni ŭ čym pierakanać niemahčyma. Voś była kroŭ u Danbasie, našych bjuć i h.d. Ja i adkazvaju: a jak vy chacieli? Kab pryjechali tudy na tankach i vas lubili? Jak ab ścianu haroch, biessensoŭna. Navat kamentavać asabliva nie vypadaje, usio zrazumieła».
Śviatłana Aleksijevič zapeŭnivaje, što pieršapačatkova jaje ahienty damaŭlalisia na interviju z karespandentam hazety «Diełovoj Pietierburh», a jak hutarka trapiła ŭ Regnum — nia viedaje:
«U mianie byli vystupleńni ŭ Maskvie i ŭ Sankt-Pieciarburhu. Usiudy byli žurnalisty, ź niekatorymi było damoŭlena pra razhornutyja hutarki. Čałaviek, jaki ŭsio heta arhanizoŭvaŭ, potym sam byŭ ahałomšany, jak tak atrymałasia, što źjaviŭsia niaŭzhodnieny materyjał. Vidać, što «Diełovoj Pietierburh» sapraŭdy admoviŭsia drukavać tekst, raz ja zabaraniła i potym jašče heta paćvierdziŭ moj pradstaŭnik. Tady hety žurnalist nadrukavaŭsia ŭ inšym miescy. Nijakamu ahienctvu ja interviju nie davała. Vyhladaje, što tam daviedalisia i vyrašyli skarystacca sytuacyjaj».
