Na dumku tureckich čynoŭnikaŭ, «supiarečlivaja» teoryja Čarlza Darvina «zanadta składanaja dla razumieńnia», tamu jaje vyrašana prybrać z padručnikaŭ dla 9 kłasa.
U sieradu kiraŭnik rady pa navučalnych prahramach pry ministerstvie adukacyi Ałpasłan Durmuš abviaściŭ, što z nastupnaha hoda z padručnikaŭ bijałohii dla 9 kłasa (dzie navučajucca 14-15 hadovyja školniki) budzie vyklučana častka teoryi evalucyi Čarlza Darvina.
Pavodle jaho słoŭ, vučni «zanadta maładyja, kab zrazumieć sprečnyja pradmiety». Pry hetym Durmuš dadaŭ, što vyvučać sprečnyja raździeły teoryi možna budzie paśla zakančeńnia škoły na stadyi bakałaŭryjatu.
Prezident Turcyi Redžep Taip Erdahan užo ŭchvaliŭ prapanavanyja źmieny ŭ školnaj prahramie, jakija buduć apublikavanyja paśla zakančeńnia Ramadana.
«Turcyja stanie druhoj krainaj paśla Saudaŭskaj Aravii, vyklučajučy teoryju evalucyi sa školnaj prahramy», - tłumačyć Fiera Ajtekin Ajdahan, kiraŭnik prafsajuza nastaŭnikaŭ, jaki abjadnoŭvaje bolš za 100 tys. vykładčykaŭ krainy.
«Navat u Iranie teoryi evalucyi ŭ škołach pryśviečana 60 hadzin, a samomu Darvinu — 11 hadzin», - dadaje jana.
Siarod inšych źmien było pamianšeńnie kolkaści hadzin, adviedzienych na vyvučeńnie bijahrafii zasnavalnika sučasnaj Turcyi Mustafy Kiemala Ataciurka.
Jak miarkujecca, inicyjataram pieramienaŭ staŭ kansiervatyŭny prafsajuz nastaŭnikaŭ, blizki da ŭrada, i ŭłady śćviardžajuć, što ŭsim papravak papiaredničali publičnyja abmierkavańnia i kansultacyi.
