Paŭnočnakarejskaja dziaržaŭnaja kampanija Mangyongdae Information Technology Corporation pačała vypusk i prodaž smartfona Jindallae 3, jaki źniešnie amal nie adroźnivajecca ad iPhone, paviedamlaje Daily Mail.
Na žal, pra charaktarystyki hetaha cuda paŭnočnakarejskaj pramysłovaści ničoha nieviadoma. Jeść tolki zajava ad raspracoŭščykaŭ, jakija paviedamlajuć, što «hrupa daśledčykaŭ idzie śledam za imknieńniem Partyi raźvivać vysokija technałohii». Taksama vytvorcy śćviardžajuć, što telefon byŭ całkam raspracavany i vyrableny ŭ KNDR. Chacia pa dyzajnie jon amal nie adroźnivajecca ad iPhone, i analityki miarkujuć, što Jindallae 3 byŭ stvorany za miežami Paŭnočnaj Karei na ŭzor kitajskich madelaŭ.
Smartfon maje nabor standartnych dadatkaŭ, takich jak kalkulatar, kartačnuju hulniu, internet-braŭzier, muzyčny płejer, prahramu dla prahladu fota, a taksama dadatak «Ukryćcio», pra jaki ničoha nieviadoma.
Heta ŭžo nie pieršy vypadak, kali paŭnočnakarejskija raspracoŭščyki kapirujuć pradukty Apple. Uviesnu kampanija Mangyongdae Information Technology Corporation taksama vypuściła ŭłasny płanšet pad nazvaj Ryonghung iPad. U 2015 hodzie ŭ Pchieńjanie pačaŭsia prodaž manabłokaŭ, jakija źniešnie nahadvajuć iMac. Akramia taho, u KNDR stvaryli apieracyjnuju sistemu Red Star OS na bazie Fedora Linux, jakaja amal całkam kapiruje interfiejs Mac OS X.
