19-hadovaja žycharka Miniesoty Monaliza Pieres padčas zdymki videarolika dla YouTube vypadkova zabiła svajho 22-hadovaha chłopca Piedra Ruiza, paviedamlaje VVS.
YouTube
Jak paviedamili ŭ palicyi, para vyrašyła źniać videarolik, na jakim Pieres stralaje ŭ Ruiza ź pistaleta praz toŭstuju knihu, paličyŭšy, što jana spynić kulu. Dla svajho ekśpierymientu jany ŭziali encykłapiedyju ŭ ćviordaj vokładcy i pistalet bujnoha kalibra Desert Eagle.
Kab źniać rolik, maładyja ludzi ŭstalavali ŭ pakoi dźvie kamiery. Śviedkami strełu stała trochhadovaje dzicia pary i kala 30 susiedziaŭ, tych, chto sabraŭsia pahladzieć na «truk».
Kali Pieres streliła, kula prabiła knihu i trapiła Ruizu ŭ hrudzi. Dziaŭčyna adrazu patelefanavała ŭ 911, adnak vyratavać maładoha čałavieka nie ŭdałosia.
Pieres paviedamiła palicyi, što ideja źniać takoje videa dla YouTube naležała Ruizu. Za dzień da trahiedyi jana zhadvała pra heta ŭ svaim tvitary.
«My ź Piedra, vidać, źbirajemsia źniać adno z samych niebiaśpiečnych videa. Heta JAHO ideja, nie MAJA», — napisała dziaŭčyna.
Pieres śćviardžaje, što małady čałaviek pierakanaŭ jaje ŭ tym, što truk nie budzie niebiaśpiečnym, i jon užo rabiŭ jaho raniej. Pa słovach dziaŭčyny, Ruiz pakazvaŭ joj inšuju knihu, jakuju kula nie prabiła naskroź.
Jak raspaviała ciotka zahinułaha maładoha čałavieka Kłaŭdyja Ruiz, z dapamohaj hetaha videarolika para chacieła pavysić papularnaść svajho kanała na YouTube i pryciahnuć bolš padpisantaŭ.
«Jany kachali adno adnaho. Hetaha nie pavinna było adbycca», — skazała žančyna ŭ intervju amierykanskamu telekanału KVLY.
Jana taksama paviedamiła, što sprabavała adhavaryć plamieńnika.
Para zaviała ułasny videabłoh na YouTube u sakaviku 2017 hoda, kab «pakazać žyćcio maładych ludziej, jakija rana stali baćkami», vynikaje z apisańnia kanała.
Monalizie Pieres, jakaja znachodzicca na siomym miesiacy ciažarnaści, pahražaje da 10 hadoŭ pazbaŭleńnia voli i štraf da 20 tysiač dalaraŭ.
Dziaŭčynu adpuścili dadomu pad zakład u 7 tysiač dołaraŭ. Jana paŭstanie pierad sudom 5 lipienia.