U svaim fejsbuku staršynia BNF Alaksiej Janukievič apublikavaŭ videa z repietycyi avijaparada, jaki, pa słovach palityka, «nie psuje asfalt i nie pieraškadžaje darožnamu ruchu». U kamientarach jaho patroliŭ žurnalist Arciom Šrajbman: «Rubryka ŠOK. Lidar BNF padtrymaŭ nabyćcio rasijskaj vajennaj techniki». «Biełaruski partyzan» spytaŭ u Alaksieja Janukieviča, navošta patrebien kult militaryzmu i jakaja naohuł karyść ad hetych paradaŭ?
— Kamu i što demanstrujuć mirnyja biełarusy?
— Ja jak dziaržaŭnik liču, što Uzbrojenyja siły Biełarusi źjaŭlajucca nadzvyčaj važnym składalnikam biełaruskaj niezaležnaści. Tamu ich treba ŭmacoŭvać. Parad u mirny čas — heta adzin z asnoŭnych i najbolš vidoviščnych sposabaŭ demanstracyi patencyjału ŭłasnych uzbrojenych sił. Asabliva avijacyjny parad, jaki nie ciahnie za saboj nijakich niazručnaściaŭ dla ludziej. Mahčyma, šum kamuści nie padabajecca. Adnak ja pierakanany, što ich varta pravodzić. Ale i naziemny parad, kali narmalna padyści da jaho arhanizacyi, važny i patrebny. Mienavita jak demanstracyja patencyjału i sił ułasnaha vojska. Ja viedaju, što mnohija vajennyja ataše, navat jakija pracujuć na niekalki krain, abaviazkova pryjazdžajuć na vajskovyja parady ŭ Minsk. Jany bačać, analizujuć. Važna, kab jany razumieli patencyjał i toje, što naša kraina nadaje ŭvahu sučasnaści i bajazdolnaści armii.
Parady važnyja taksama dla suajčyńnikaŭ, kab jany hanarylisia i daviarali svajoj armii. Demanstracyja abaranazdolnaści armii taksama pracuje na farmiravańnie nacyjanalnaj śviadomaści i ŭzmacnieńnie patryjatyzmu, što asabliva važna dla Biełarusi siońnia.
— Dy my ž chvalimsia i rasijskimi samalotami? A BNF vystupaje suprać rasijskaj armii ŭ Biełarusi. Vychodzić, my nabyvajem techniku ŭ patencyjnaha ahresara, jak nazyvajuć Rasieju nacyjanalna aryjentavanyja siły.
— U našym rehijonie, heta tyčycca i Biełarusi, niebiaśpieka vajennaj ahresii ŭ pieršuju čarhu zychodzić ad Rasiei. Tak, technika, jakaja demanstrujecca, jana albo dastałasia nam u spadčynu ad SSSR, albo naŭprost nabytaja ŭ Rasii. Choć jość i vyklučeńni — vydatnaja ŭłasnaja raspracoŭka «Pałanez».
Što tyčycca staroj savieckaj techniki, to jaje vielmi hłyboka madernizavali. Faktyčna heta novyja ŭzory ŭzbrajeńnia. Navukovy i inžynierny patencyjał Biełarusi vielmi dobra prajaŭlajecca. Biełaruskaj madernizacyjaj techniki da sučasnych uzoraŭ my možam hanarycca. Na hetym my možam zarablać, užo zarablajem i pavinny zarablać u budučyni.
Z nahody najnoŭšych viertalotaŭ, jakija niadaŭna kupili ŭ Rasii, albo vučebna-bajavych samalotaŭ, to my možam ich vykarystać pa svaim rašeńni ŭ luboj situacyi, kali heta budzie nieabchodna. U karotkaterminovaj pierśpiektyvie — heta bolš pazityŭny krok biełaruskich uładaŭ, čym raźmiaščać u krainie rasijskija čaści ź ich samalotami i viertalotami. Lepš mieć svajo.
Stratehična my vystupajem za bolš ciesnaje supracoŭnictva z NATA. My adzinaja partyja ŭ Biełarusi, jakaja vystupaje za ŭvachodžańnie Biełarusi ŭ Aljans i pieraaryjentacyju na standarty NATA ŭ vajennaj śfiery.
«Chočaš miru — rychtujsia da vajny»
Praciŭniki demanstracyi vajskovaha patencyjału ŭ formie paradaŭ prapanujuć pieranakiravać vydatki na bolš patrebnyja rečy, naprykład, na miedycynu. Alaksiej Janukievič na heta adkazvaje dźviuma cytatami:
— Jašče staražytnyja rymlanie kazali: «Chočaš miru — rychtujsia da vajny». I heta pracavała 2 tysiačy hadoŭ tamu i pracuje ciapier, zastajecca aktualnym. Taksama jość trapny vyraz: «Kali škaduješ srodki na toje, kab karmić svaju armiju, — budzieš karmić čužuju». Biezumoŭna, nam patrebna bajazdolnaja armija. Na heta treba vydatkoŭvać hrošy.
— Što dumajecie pra pakłanieńnie kultu vajny z malenstva i pra dziaciej u formie čyrvonaarmiejcaŭ?
— Treba ŭmieć pravodzić roźnicu pamiž tupym uschvaleńniem savieckaj spadčyny, nakiravanym na ŭzmacnieńnie rasijskich i impieryjalistyčnych iluzij i mar, i pavahaj da vajennaj spravy i vajskoŭcaŭ. Duch savietčyny i kult savieckaj Čyrvonaj Armii, jaki ciapier pa iniercyi z Rasii pierajmajuć u tym liku i biełaruskija vajskoŭcy, ciahnuć nas nazad. Voś ad hetaha treba admaŭlacca nieadkładna. Heta škodna i niezdarova.
Ale svajo vojska treba pavažać. Zaŭsiody buduć drennyja chłopcy, treba, kab dobryja byli hatovyja dać im adpor.
— Dobraje i drennaje ŭ nas, na žal, vyznačajuć ludzi pry ŭładzie…
— Hetaje pytańnie tyčycca źmieny ŭłady, a nie armii.
Pa słovach Alaksieja Janukieviča, demakratyčnyja krainy taksama kultyvujuć pavahu i aŭtarytet da ŭłasnych uzbrojenych siłaŭ. Niekatoryja pravodziać avijacyjnyja i naziemnyja parady, niekatoryja zdymajuć proma-roliki i dakumientalnyja filmy — «što patrabuje, pa vialikim rachunku, bolšych finansaŭ», adznačaje palityk.
— Parady — heta nie tolki savieckaja ci kamunistyčnaja spadčyna. Vajskovyja parady — histaryčnaja forma. Inšaja sprava, sama arhanizacyja i padrychtoŭka da ich — jaje treba pierahledzieć u Biełarusi. Jość kałasalnaje pole dla ŭdaskanaleńniaŭ. Ale sam parad, jak demanstracyja vajskovych mahutnaściaŭ i inžyniernaj dumki, — heta aktualna i važna. Liču, što ŭsio heta treba niezaležnaj Biełarusi.
