Mižnarodny ekśpiert voźmie ŭdzieł u 26-j štohadovaj siesii Parłamienckaj Asamblei ABSIE, jakaja budzie prachodzić 5 — 9 lipienia ŭ Minsku.
Pa pryjeździe ŭ Minsk Mikłaš Charašci vykazaŭ škadavańnie nakont taho, što hety vizit u Biełaruś jon ažyćciaŭlaje nie ŭ jakaści śpiecdakładčyka AAN, tym nie mienš, jon paviedamiŭ, što svaju pazicyju adnosna situacyi z pravami čałavieka ŭ Biełarusi zmoža ahučyć na aficyjnaj placoŭcy: u jakaści zaprošanaha ekśpierta spadar Charašci vystupić na paralelnym mierapryjemstvie padčas 26-j siesii Parłamienckaj Asamblei ABSIE, jakoje adbudziecca 6 lipienia.
U kamientary z nahody vizitu ŭ Biełaruś jon vykazaŭ spadziavańnie, što ŭdzieł u takim aficyjnym mierapryjemstvie, jak siesija PA ABSIE, stanie pieršym krokam na šlachu da pryznańnia aficyjnym Minskam mandata krainavaha śpiecdakładčyka AAN.
Nahadajem, z 2012 hoda Mikłaš Charašci źjaŭlajecca Śpiecyjalnym dakładčykam pa pytańni ab stanoviščy ŭ halinie pravoŭ čałavieka ŭ Biełarusi Savieta pa pravach čałavieka AAN. Adnak biełaruskija ŭłady ad samaha pačatku nie pryznajuć hety mandat i admaŭlajucca ad supracoŭnictva sa śpiecdakładčykam. Naviedać Biełaruś u hetaj jakaści spadar Charašci nie mieŭ mahčymaści, pakolki na heta nieabchodna aficyjnaje zaprašeńnie ŭładaŭ.
Pry padrychtoŭcy ŭsich svaich spravazdačaŭ śpiecdakładčyk vykarystoŭvaje infarmacyju ad biełaruskich pravaabaroncaŭ, ekśpiertaŭ, žurnalistaŭ, ź jakimi sustrakajecca za miežami krainy, čerpaje nieabchodnyja źviestki z aficyjnych dakumientaŭ, a taksama ź pierapiski hramadzianaŭ Biełarusi ź inšymi pravaabarončymi miechanizmami AAN.
Apošniuju spravazdaču pa Biełarusi śpiecdakładčyk pradstaviŭ Radzie pa pravach čałavieka AAN 14 červienia hetaha hoda, a 23 červienia Rada pryniała rezalucyju pa Biełarusi i padoŭžyŭ mandat śpiecdakładčyka jašče na adzin hod. Pravaabarončaja supolnaść vitała praciah mižnarodnaha kantrola za situacyjaj u Biełarusi.
