Kamitet Suśvietnaj spadčyny JUNIESKA, pasiadžeńnie jakoha prachodzić u Krakavie, zaklikaŭ polskija ŭłady nieadkładna spynić vysiečku dreŭ u samaj staroj častcy Biełaviežskaj puščy i pryniać misiju ekśpiertaŭ, paviedamlaje Radyjo Polšča.
Paśla ŭniasieńnia papravak, jakija raniej u sieradu prapanavaŭ Kazachstan, kamitet pahadziŭsia padoŭžyć termin pradstaŭleńnia spravazdačy ab stanie puščy da śniežnia 2018 hoda. Pry hetym u raparcie zastaŭsia zapis ab mahčymym uniasieńni Biełaviežskaj puščy ŭ śpis abjektaŭ Suśvietnaj spadčyny JUNIESKA, jakija znachodziacca pad pahrozaj.
Nahadajem, u Biełaviežskaj puščy praciahvajucca pratesty ekołahaŭ suprać vysiečki dreŭ. Aktyvisty prykoŭvajuć siabie da ciažkaj techniki, pieraškadžajučy jaje pieramiaščeńniu. Niekalki razoŭ palicyja ŭmiešvałasia ŭ pratest i adciaśniała pratestoŭcaŭ. Raniej polskija ŭłady pryniali rašeńnie ab sanitarnaj vysiečcy častki Biełaviežskaj puščy, jakaja nie ŭvachodzić u zapaviednik. Paviedamlałasia, što pryčynaj takoha rašeńnia stała biespaśpiachovaja baraćba leśnikoŭ z žukom-karajedam, što źniščaje drevy.
Jeŭrakamisija letaś zaviała spravu suprać Polščy ŭ suviazi z vysiečkaj dreŭ u Biełaviežskaj puščy. U svaju čarhu, polski ministr navakolnaha asiarodździa Jan Šyško niekatory čas tamu kazaŭ u Siejmie, što Biełaviežskaja pušča była niezakonna ŭniesienaja ŭ śpis pryrodnaj spadčyny JUNIESKA.
