Načalnik hałoŭnaha ŭpraŭleńnia ideałahičnaj pracy Minharvykankama Pavał Skałaban nie dazvoliŭ žyvuju prezientacyju albomu Alesia Dzianisava «Karotkaja historyja Biełarusi». TuzinFM paličyŭ hetaje rašeńnie niezakonnym i padaŭ zajavu ŭ sud.
Tak vyjšła, što syn znakamitaha archivista i historyka Pavał Skałaban zabaraniŭ pravodzić prezentacyju muzyčnaj prahramy, pryśviečanaj historyi Biełarusi. Albom «Karotkaja historyja Biełarusi» na słovy Alesia Čobata muzyka Aleś Dzianisaŭ prezentavaŭ na TuzinFM na pačatku leta, a 16 vieraśnia miełasia adbycca žyvaja prezentacyja ŭ Miensku. Adpaviednaja zajava na atrymańnie hastrolnaha paśviedčańnia była nakiravanaja ŭ Mienharvykankam. Ale paśla taho, jak hałoŭnaje ŭpraŭleńnie paprasiła pradastavić teksty piesień, jakija buduć vykonvacca na kancercie, u vydačy hastrolki było admoŭlena. Admietna, što ŭ adkazie kiraŭnik idealahičnaha ŭpraŭleńnia P. Skałaban upieršyniu spasłaŭsia na Kodeks «Ab kultury» (raniej kancerty nie dazvalalisia sa spasyłkaju na ŭkaz kiraŭnika dziaržavy №257, na punkt, u jakim viałosia pra prapahandu vajny, ekstrymizmu dy inšaha).
Zhodna z p.1.3 art. 215 Kodeksa Respubliki Biełaruś «Ab kultury», na jaki spasyłajecca ideolah, padstavaj dla admovy ŭ praviadzieńni kancertu źjaŭlajecca «zaklučeńnie mastackaha savieta pa kulturna-vidoviščnych mierapryjemstvach ab nizkim mastackim uzroŭni vykanańnia». Adpaviednaha zaklučeńnia vydadziena nie było, a na prośby choć niešta patłumačyć z nahody admovy, hałoŭny ideolah nie adreahavaŭ. Tamu było pryniataje rašeńnie abskardzić dziejańni dziaržaŭnaha orhana ŭ sudovym paradku. Adpaviednuju zajavu arhanizatar kancertu i kiraŭnik TuzinFM Siarhiej Budkin padaŭ u Ekanamičny sud horada Miensku.
«Ja nie razumieju, jakim čynam adbyŭsia zamier mastackaha ŭzroŭniu vykanańnia, chto heta rabiŭ, jakim čynam, pa jakich kryterach i navošta. U lubym razie, vyrašać hetaje pytańnie musiać sami słuchačy, a nie čynoŭniki ŭ kabinetach. Pierakanany ŭ tym, što dziejańni ideolahaŭ absalutna niezakonnyja. Vidavočna, što my majem spravu z cenzuraju. Prykra, što nam pieraškadžajuć padtrymać Alesia Čobata — aŭtara vieršaŭ da hetaha albomu, jaki całkam straciŭ zrok i žyvie zusim adzin u svajoj chacie ŭ Skidzieli. My chacieli pieradać jamu častku hrošaj, atrymanych z kancertu», — raspaviadaje Siarhiej Budkin.
Arhanizatara kancertu padtrymlivaje juryst pravaabarončaha centru «Viasna» Valancin Stefanovič: «Sam punkt kodeksu «Ab kultury», na jaki spasyłajucca ideolahi, parušaje zakanadaŭstva. Bo ŭ Kanstytucyi harantujecca svaboda vykazvańnia svajho mierkavańnia, u tym liku i ŭ mastackaj formie. Abmiežavańni dapuskajucca tolki ŭ tych vypadkach, kali heta niasie niebiaśpieku — hramadzkamu paradku, maralnaści, zdaroŭju, pravam inšych… A heta nia toj vypadak», — tłumačyć juryst.
U zajavie, skiravanaj u Ekanamičny sud, jość dźvie prośby: pryznać dziejańni ŭpraŭleńnia idealahičnaj pracy niezakonnymi i abaviazać hetaje ŭpraŭleńnie vydać hastrolnaje paśviedčańnie na lubuju prymalnuju dla arhanizataraŭ datu.
Dachod ad prajekta «Karotkaja historyja Biełarusi» mieŭ pajści na padtrymku ślapoha paeta Alesia Čobata.
