Čytač «Našaj Nivy» Źmicier K. źviarnuŭ uvahu na toje, što čarhovaja kaviarnia sietki pirahovych «Šarłota», jakaja zvyčajna drukavała mieniu pa-biełarusku dy była viadomaja svaim łozunham «Smakuj svajo — rodnaje», adyšła ad raniejšaj tradycyi i niečakana rusifikavałasia. Novaja, tolki-tolki adčynienaja kropka na Jasienina, užo rekłamavałasia całkam pa-rusku.
Ilustracyjnaje fota.
«Ja vystupaju za biełarusizacyju i na pracy, i ŭ paŭsiadzionnym žyćci, tamu takija momanty dla mianie vielmi pryncypovyja. Jość ža tłumačeńnie Dziaržstandartu, što dla tavaraŭ, nie pryznačanych na ekspart, nie abaviazkova vykarystoŭvańnie ruskaj movy. Jak heta tyčycca kram i kafe, jakija pracujuć niepasredna ŭ Biełarusi? Nakolki ja viedaju, niama zakonaŭ, jakija b rehulavali abaviazkovuju najaŭnaść ruskaj movy na ajčynnych ustanovach», — aburajecca Źmicier.
Sapraŭdy, niama praviłaŭ, jakija b rehulavali hety momant.
Novaja redakcyja zakona «Ab abaronie pravoŭ spažyŭcoŭ» pakinuła normu, zhodna ź jakoj vytvorca moža vybirać, na jakoj movie ŭkazvać infarmacyju ab tavary abo pasłuzie: biełaruskaj ci ruskaj.
Adnačasova z hetym standarty Mytnaha sajuza patrabujuć abaviazkovaj najaŭnaści ruskaj movy, tamu vytvorcy, tavary jakich iduć na ekspart, z metaj «ekanomii srodkaŭ i miesca na ŭpakoŭcy» da biełaruskaj amal nie źviartajucca.
Praŭda, jak pakazvaje praktyka, movu pryciskajuć navat tam, dzie pra ekspart i havorki niama.
Jak patłumačyŭ u kamientaryi «NN» dyrektar sietki «Šarłota» Źmicier Litvinienka, z vykarystoŭvańniem nadpisaŭ na movie ŭ ich «byli prablemy»:
«Jašče vosieńniu kantralujučyja dziaržorhany pačali patrabavać ad nas dublavańnia ceńnikaŭ dy składu pradukcyi na dźviuch movach. U nas i biez hetaha tekst mieniu byŭ drobny, a kali niešta paŭtarać — čałaviek uvohule ničoha nie zmoh by pračytać, tamu my dapradajem stary rekłamny tyraž, ale ŭžo vypuścili novy, na ruskaj».
Chto kankretna telefanavaŭ dyrektaru sietki, apošni kazać admoviŭsia. U ministerstvie handlu ličuć, što, kali niechta i moh takoje zrabić, to tolki pa pryčynie niekampietentnaści.
Ministerstva antymanapolnaha rehulavańnia i handlu: «Heta absurd!»
«U Biełarusi — dźvie nacyjanalnyja movy, i na siońnia kožny subjekt haspadarańnia maje prava drukavać mieniu ci rekłamu choć na dvaccaci movach, hałoŭnaje, kab u hetym śpisie prysutničała ci ruskaja, ci biełaruskaja. Nie viedaju, chto moh cisnuć na pradprymalnika ŭ hetym kirunku. Moža, niechta ź miascovaj administracyi ci z vykankama schibiŭ… Ale heta absurd, u situacyju nie ŭnikli abodva baki, i ŭ vyniku atrymałasia hłupstva. Treba ŭvažliva ŭčytvacca ŭ zakanadaŭstva, kab nie było takich prablem», — prakamientavała «NN» namieśnik načalnika ŭpraŭleńnia bytavoha absłuhoŭvańnia i hramadskaha charčavańnia hałoŭnaha ŭpraŭleńnia arhanizacyi handlu i pasłuh Ministerstva antymanapolnaha rehulavańnia i handlu Łarysa Kamarova.
Chto nie dahavorvaje ŭ hetaj historyi — tak i zastaniecca zahadkaj. Abnoŭleny sajt pirahovaj taksama zrobleny całkam pa-rusku, zachavaŭsia tolki łozunh «Smakuj svajo — rodnaje». Vidavočna, vytvorcy i ŭładalniki kafe iduć pa šlachu najmienšaha supracivu i robiać vybar nie na karyść movy, jak tolki heta stvaraje minimalnyja prablemy.
Čytajcie taksama: Pałata pradstaŭnikoŭ pakinuła ŭ sile prysud biełaruskaj movie na ŭpakoŭkach pradukcyi
