Hienierał-major Aleh Dvihaloŭ pryznačany staršynioj Dziaržaŭnaha vajenna-pramysłovaha kamiteta. Dahetul jon byŭ kamandujučym Vajenna-pavietranymi siłami i vojskami supraćpavietranaj abarony Uzbrojenych Sił Biełarusi.
Adpaviedny ukaz 18 lipienia padpisaŭ Alaksandr Łukašenka, paviedamili ŭ pres-słužbie biełaruskaha lidara.
mil.by
Aleh Dvihaloŭ naradziŭsia 21 maja 1965 hoda na vostravie Vite Paŭnočnamorskaha rajona Murmanskaj vobłaści.
Paśla zakančeńnia ŭ 1987 hodzie Minskaha vyšejšaha inžyniernaha zienitnaha rakietnaha vučylišča SPA vajennuju słužbu prachodziŭ na pasadach načalnika raźliku antennaha pasta radyjotechničnaj batarei zienitnaha rakietnaha dyvizijona, namieśnika kamandzira radyjotechničnaj batarei — aficera naviadzieńnia zienitnaha rakietnaha dyvizijona, načalnika ŭlikova-apieracyjnaha adździaleńnia — načalnika štaba miascovaj abarony składa rakietna-artyleryjskaha ŭzbrajeńnia i bojeprypasaŭ, načalnika ŭlikova-apieracyjnaha adździaleńnia składa rakietna-artyleryjskaha ŭzbrajeńnia i bojeprypasaŭ, staršaha aficera hrupy apracoŭki infarmacyi centra apieratyŭnaj vyviedki kamandnaha punkta Vojskaŭ SPA, staršaha aficera hrupy apracoŭki infarmacyi centra apieratyŭnaj vyviedki centralnaha kamandnaha punkta, načalnika centra apieratyŭnaj vyviedki centralnaha kamandnaha punkta.
Paśla zakančeńnia ŭ 2001 hodzie Vajennaj akademii Biełarusi vajennuju słužbu prachodziŭ na pasadach namieśnika načalnika pa vychavaŭčaj pracy centralnaha kamandnaha punkta Vojskaŭ SPA, namieśnika načalnika punkta vajskovaj čaści VPS i vojskaŭ SPA, kamandzira vajskovaj čaści — namieśnika pa bajavym kiravańni načalnika Hałoŭnaha štaba VPS i vojskaŭ SPA.
Paśla zakančeńnia ŭ 2008 hodzie fakulteta Hienieralnaha štaba Vajennaj akademii Respubliki Biełaruś vajennuju słužbu prachodziŭ na pasadzie načalnika štaba — pieršaha namieśnika kamandujučaha vojskami PZATK VPS i vojskaŭ SPA.
U červieni 2011 hoda byŭ pryznačany na pasadu načalnika hałoŭnaha štaba — pieršaha namieśnika kamandujučaha Vajenna-pavietranymi siłami i vojskami supraćpavietranaj abarony.
