Čarhovy zamiežny forum dla patencyjnych investaraŭ ułady Biełarusi praviaduć 27 kastryčnika ŭ Luksemburhu. Forum budzie mieć status biełaruska-eŭrapiejskaha.
Pra heta paviedamlaje Nacyjanalnaje ahienctva investycyj i pryvatyzacyi.
Pavodle viedamstva, hałoŭnaj metaj Biełaruska-eŭrapiejskaha ekanamičnaha forumu — stvareńnie placoŭki dla naładžvańnia ŭzajemadziejańnia biełaruskich kredytna-finansavych ustanovaŭ z eŭrapiejskimi partnerami, prasoŭvańnie raspracovak biełaruskaj ekanomiki ŭ zachodnich dziełavych kołach, pryciahnieńnie zachodnich investycyj u novyja vytvorčyja mahutnaści Biełarusi.
«Vybar placoŭki dla praviadzieńnia Biełaruska-eŭrapiejskaha ekanamičnaha forumu abumoŭleny pryznanym aŭtarytetam Luksemburhu ŭ sfery mižnarodnych finansaŭ, — adznačajuć u ahienctvie. — Heta viadučy ŭ Eŭropie i druhi ŭ śviecie paśla ZŠA investycyjny centar. Kraina z paŭmiljonnym nasielnictvam naličvaje amal 4 tysiačy investycyjnych fondaŭ i 143 banki. Sukupny kapitał luksemburskaj finansavaj systemy składaje bolš za 740 miljardaŭ eŭra».
Jak raźličvajuć arhanizatary, zručnaje hieahrafičnaje raźmiaščeńnie dazvolić pryciahnuć da ŭdziełu ŭ forumie niamieckija, francuskija, belhijskija, niderlandzkija kampanii.
Biełaruś raniej užo arhanizoŭvała investycyjnyja forumy ŭ Fankfurcie-na-Majnie, Londanie, Ńju-Jorku, Stambule, Seule. Adnak pazytyŭna źmianić investycyjny imidž Biełarusi jany nie zmahli.
«Pravodzić takija forumy treba. Kaliści, bolš za 20 hadoŭ tamu, i ja taksama ŭdzielničaŭ u padobnych mierapryjemstvach, — vykazaŭ mierkavańnie karespandentu Radyjo Svaboda eks-staršynia Nacyjanalnaha banku Stanisłaŭ Bahdankievič. — Inšaja sprava, što kali my havorym pra efekt, to treba najpierš, kab dla investycyj byli spryjalnyja ŭnutranyja ŭmovy. Bo ŭ Biełarusi dasiul nie praviedzienyja ekanamičnyja reformy, kraina ŭ izalacyi. Treba, kab byŭ spryjalny investycyjny klimat, kab pavažali ŭłasnaść».
