Supracoŭniki čyhunačnaj milicyi na Biełaruskim vakzale Maskvy zatrymali pravadnikoŭ ciahnika «Bieraście — Maskva» biełaruskaha farmavańnia, piša sajt REGIONS.RU.
25 žniŭnia ŭ tamtejšaje adździaleńnie źviarnuŭsia maskvič. U zajavie jon raskazaŭ historyju, vartuju kinascenara.
Takim čynam, 23 žniŭnia niebaraku spatrebiłasia dajechać da Viaźmy — pa časie i adlehłaści heta jak ad Miensku da Voršy, — ale ŭsie kvitki byli ŭžo pradadzienyja. Tady jon vyrašyŭ padyści da načalnika ciahnika na Bieraście, kab toj jamu dazvoliŭ padjechać za najaŭnyja hrošy.
Kali načalnik ciahnika admoviŭ, mužčyna nie razhubiŭsia j damoviŭsia z pravadnikami dvanaccataha vahonu za 250 rubloŭ (heta kala 21 tysiačy biełaruskimi). Paśla taho, jak ciahnik adjechaŭ, maskvič padyšoŭ da pravadnikoŭ i praciahnuŭ im kupiuru ŭ adnu tysiaču rasiejskich rubloŭ.
Zamiest rešty, pavodle zajavy paciarpiełaha, pravadniki pirchnuli jaho niekalki razoŭ u hrudzi, a paśla ŭsunuli švabru j zahadali prybirać vahon. Maskvič chacieŭ byŭ vyklikać milicyju, dy za heta pravadniki adabrali ŭ jaho dakumenty, sotavy telefon i 5 tysiač rubloŭ.
Na pieršym ža prypynku ŭ Mažajsku, amal praź dźvie hadziny niahodaŭ, mužčyna pasprabavaŭ vyjści preč, ale pakul ciahnik stajaŭ, pravadniki jaho z vahonu nie puskali, zatoje kali sastaŭ rušyŭ, vykinuli jaho prosta na platformu.
Niebaraka ŭ dadatak da ŭdaraŭ hrudnoj kletki atrymaŭ strasieńnie hałaŭnoha mozhu.
Maskoŭskija śledčyja ŭsčali kryminalnuju spravu za rabaŭnictva z prymianieńniem hvałtu, dačakalisia zvarotnaha rejsu j 25 žniŭnia aryštavali dvuch biełarusaŭ — maładzionaŭ 23 i 25 hadoŭ.
Im vystavili abvinavačańnie j kinuli ŭ viaźnicu.