Siońnia było druhoje pasiedžańnie suda pa spravie Alaksandra Barazienki — žurnalista vinavaciać u parušeńni aŭtarskich pravoŭ, źviazanych z brendam «Biełsat». Apytvali śviedak pa spravie. Adzin sa śviedak zajaviŭ, što jaho nichto raniej nie apytvaŭ, chacia adpaviedny pratakoł užo dałučany da spravy.
Adździeł pa baraćbie z ekanamičnymi złačynstvami RUUS Pieršamajskaha rajonu Mienska skłaŭ pratakoł na žurnalista Alaksandra Barazienku «za parušeńnie aŭtarskich, sumiežnych i patentnych pravoŭ» (artykuł 9.21KoAP). Ciapier jamu pahražaje štraf ad 460 da 1150 rubloŭ. Pravaachoŭniki chočuć zrabić Barazienku adkaznym pa spravie ab nibyta parušeńnie aŭtarskich pravoŭ, źviazanych z brendam «Biełsat». Sam apieratar ličyć, što «spravu zaviali, kab kanfiskavać techniku, na jakoj jon pracuje».
U sudzie dapytali śviedku Alaksandr Jankoŭskaha, jaki adbyvaŭ aryšt u adzin čas z Barazienkam na Akreścina. Śviedka nie pamiataje, kolki byŭ na «sutkach» i kali.
Taksama ŭ spravie jość pratakoł apytańnia Jankoŭskaha, ale śviedka skazaŭ, što jaho nie apytvali. «Napeŭna niechta pisaŭ pad kapirku», — zajaviŭ Jankoŭski.
Advakat paŭtorna chadajničaŭ ab dałučeńni da spravy vynikaŭ apytańnia Barazienki na detektary chłuśni. Chadajnictva paŭtorna nie zadavolili.
Zatym advakat zajaviła chadajnictva viarnuć pratakoł u milicyju na dapracoŭku ŭ suviazi z parušeńniami. Chadajnictva było zadavolena.
Paśla taho, jak pratakoł budzie dapracavany, praciahniecca razhlad spravy.
