U sudzie Zavodskaha rajona Minska pačaŭsia razhlad spravy Amiduły Nabizada — hramadzianina Šviecyi z afhanskimi karaniami. Jon znachodzicca pad vartaj z krasavika 2016 hoda. 32-hadovaha Nabizada vinavaciać u machlarstvie i «admyvańni» nielehalnych dachodaŭ.
Amiduła Nabizada
Biznesoviec ci machlar?
Uvohule, historyja vielmi zabłytanaja. Viadoma, što Nabizada zajmaŭsia biznesam, jon — ułaśnik pradpryjemstva «BiełTytan» u Navapołacku (zajmajecca vytvorčaściu plonki), nabyŭ «Baranavičydreŭ», u jaki płanavałasia ŭkłaści bolš za $8 miljonaŭ (ale hety biznes jon «nie paciahnuŭ»). Na momant zatrymańnia Nabizada byŭ hiendyrektaram TAA «Ekadoryja», kampanii, jakaja i zajmałasia «Baranavičydrevam».
Adnak, sudziać Amidułu — zdavałasia b paśpiachovaha biznesmiena — za padman svaich znajomych i partnioraŭ dy vyciahvańnie ź ich hrošaj.
KDB ahučyŭ infarmacyju pra zatrymańni hramadzian Armienii, Biełarusi i Šviecyi, jakija abvinavačvajucca ŭ bujnym machlarstvie. Pavodle viersii siłavikoŭ, zatrymanyja śćviardžali, što ŭ ich jość suviazi ŭ KDB, Śledčym kamitecie i siarod vysokich słužbovych asobaŭ dziaržavy i prapanavali žycharu Biełarusi «vyrašyć» pytańnie, źviazanaje z rasśledavańniem kryminalnaj spravy. Za hetuju «pasłuhu» biełarus addaŭ zamiežnikam 335 tysiač dalaraŭ i juvielirnyja vyraby bolš čym na 150 tysiač dalaraŭ. Ahulnaja suma za nibyta akazanyja pasłuhi pavinna była skłaści 1,5 miljona dalaraŭ ZŠA, ale ž «pamahatych» zatrymali. Adnym ź ich i byŭ Nabizada.
Biežaniec ci šviedski hramadzianin?
Taksama niezrazumieła, što z hramadzianstvam Nabizada. Raniej paviedamlałasia, što jon hramadzianin Šviecyi. Pra heta jon skazaŭ i na sudzie. Ale raniej KDB zajaŭlała, što Nabizada ŭ statusie biežanca znachodziŭsia na terytoryi Biełarusi z 1999 pa 2004 hod pad inšymi ankietnymi dadzienymi. U kastryčniku 2004 hoda jon źjechaŭ ź Biełarusi, a ŭ śniežni viarnuŭsia — z novym imieniem i šviedskim pašpartam, jaki atrymaŭ ašukanskim šlacham, śćviardžali siłaviki.
Sam Nabizada zapeŭnivaje, što jon šviedski hramadzianin, skončyŭ Stakholmskuju škołu ekanomiki.
Ale ž jon praciahły čas žyŭ u Biełarusi, žanaty ź minčankaj, maje troje niepaŭnahadovych dziaciej. Razmaŭlaje pa-rusku bieź pierakładčyka.
«Kidaŭ» partnioraŭ adnaho za adnym
Pa viersii śledstva, Nabizada byŭ nie stolki biznesmienam, kolki machlarom. Jon pastajanna arhanizoŭvaŭ novyja biznesy, braŭ z partnioraŭ hrošy, jakija prysvojvaŭ.
Paciarpiełymi pa spravie prachodziać troje. Plus jašče dvoje padali hramadzianski pazoŭ ad kampanii.
Z adnym z paciarpiełych, biełarusam Mikałajem Dudko Nabizada zasnavaŭ kampaniju «Ekadoryja». Jana pavinna była zaniacca vytvorčaściu na «Baranavičydrevie».
Ale, pa słovach prakurora, Nabizada praz padkantrolnuju brytanskuju firmu padrabiŭ dakumienty ab prodažy abstalavańnia, jakoje nibyta kaštavała 3,4 miljona jeŭra.
Dudko ŭnios svaju dolu — amal miljon jeŭra. Hetyja hrošy Nabizada pieravioŭ na rachunak inšaj svajoj firmy.
Paśla jon pierakanaŭ Dudko pieraličvać to 40, to 20 tysiač jeŭra. Nibyta na ramont cecha, dastaŭku abstalavańnia… Dudko hrošy davaŭ.
Inšym biełaruskim pradprymalnikam z kampanii «Alimpik Hołd Inviest» Nabizada prapanavaŭ razam zaniacca vytvorčaściu žalezabietonnych kanstrukcyj. Jany zarehistravali TAA «Bieton Prajekt», paśla čaho Nabizada iznoŭ pačaŭ brać hrošy nibyta na abstalavańnie. Hetych partnioraŭ Nabizada «kinuŭ» bolš čym na $300 tysiač. Ciapier «Alimpik Hołd Inviest» padaje hramadzianski pazoŭ, kab viarnuć hrošy.
Nie hrebavaŭ jon i mienšymi sumami. Treciaja paciarpiełaja pieraličyła 100 miljonaŭ rubloŭ na budaŭničyja materyjały. Zastałasia ni z čym.
«KDB — złačyncy! Jany ŭsio pierakrucili!»
Ale samy cikavy z paciarpiełych — rasijski miljanier Viačasłaŭ Pahosaŭ.
Z Pahosava Nabizada płanavaŭ uziać $1,3 miljona, kab «dapamahčy vyrašyć pytańnie» ź siłavikami. Paśla — zapisaŭ na aficyjny pryjom da namieśnika staršyni Śledčaha kamiteta, a pierad Pahosavym zrabiŭ vyhlad, što pryjom arhanizavaŭ sam.
Za pasłuhi Nabizada atrymaŭ ad Pahosava piarścionak za $150 tysiač i braślet za $20 tysiač. Zatym Pahosaŭ jašče pieraličyŭ kala $300 tysiač na rachunak «Ekadoryi». Paźniej — jašče $100 tysiač.
Pry hetym, Viačasłaŭ Pahosaŭ ličyć hałoŭnym złačyncam nie Nabizadu, a armianina Vasaka Kastandziana, jakoha zatrymali razam ź siońniašnim abvinavačanym. Pahosaŭ upeŭnieny, što asnoŭny ruchavik historyi — armianin Kastandzian.
Na sudzie Pahosaŭ zajaviŭ chadajnictva, kab spravu viarnuli na daśledavańnie.
«Usio niapravilna, ja dakažu heta. KDB — złačyncy, jany ŭsio pierakrucili, - pačaŭ kryčać na sudzie Pahosaŭ. — Ja dakažu, ja lepš za ŭsich viedaju spravu. Śledstva ŭviało ŭ zman i prakuraturu, i sud. Kali razabracca, tam usio inakš. Nazibada — tolki na 20% złačynca!»
Praŭda, sudździa da miljaniera nie prysłuchałasia. Chadajnictva adchilili.
Sam Amiduła Nabizada vinu nie pryznaŭ ni pa adnym z epizodaŭ.
«Abvinavačvańni — nadumanyja i sfabrykavanyja», - zajaviŭ jon.
Chto taki Pahosaŭ
Varta adznačyć asobu Viačasłava Pahosava. Rasijski miljanier, jaki žyvie ŭ Minsku i maje navat vid na žycharstva ŭ Biełarusi, pastajanna ŭspłyvaje ŭ historyjach, źviazanych z chabaram.
Viačasłaŭ Pahosaŭ, fota tut.by
U 2008 hodzie biełaruski sudździa prapanavaŭ Pahosavu dapamohu ŭ pryvatyzacyi pamiaškańnia pad kramu ŭ Minsku. Pahosaŭ daŭ 600 tysiač jeŭra, ale nie atrymaŭ pamiaškańnia, hrošy taksama straciŭ. Jon pajšoŭ u milicyju, źviartaŭsia ŭ sud.
A ŭ 2011 hodzie ŭ Viačasłava Pahosava ź siejfa źnikła hrošaj i kaštoŭnaściaŭ na paŭmiljona jeŭra. Praz try hady — jašče amal sto tysiač. Pahosaŭ vyrašyŭ, što vinavata jaho sužycielka i pieradaŭ minskim śledčym Siarhieju Kastyku i Alehu Mielnikavu 30 tysiač dalaraŭ «za abjektyŭnaje rasśledavańnie dvuch kradziažoŭ». Ale spravy nie ruchalisia, tady biznesmen zapatrabavaŭ ad śledčych viarnuć hrošy. Tyja nie zmahli, bo hrošy patracili. Pahosaŭ pajšoŭ u KDB, śledčych aryštavali. Pahosaŭ paźbieh adkaznaści za daču chabaru i vystupaŭ u sudzie ŭ jakaści śviedki. Kastyka i Mielnikaŭ byli prysudžanyja da 7,5 hadoŭ źniavoleńnia i pazbaŭleny śpiecyjalnych zvańniaŭ «padpałkoŭnik justycyi».
I voś, u 2016 hodzie, z dapamohaj Nabizada miljanier iznoŭ vyrašyŭ razrulić prablemy praz chabar. I iznoŭ — niaŭdała.
Čytajcie taksama:
Jak minskija śledčyja raźviali na hrošy rasijskaha miljaniera — sud
