Vyjaŭleńnie vybuchovaha rečyva dazvoliła palicyi vykazać zdahadku, što terarystyčnaja hrupoŭka mieła namier nie abmiažoŭvacca napadam ŭ Barselonie.
Śledčyja, jakija pračesvali ruiny doma, što vybuchnuŭ u minułuju sieradu ŭ Alkanary (pravincyja Tarahona), vyjavili ŭ mierkavanym prystaniščy barselonskich terarystaŭ ślady tryperaksidu acetonu, viadomaha jak vybuchoŭka «maci satany», paviedamlaje El Pais.
Kali pieršapačatkova pažarnyja zajavili, što vybuch mierkavana adbyŭsia ŭ vyniku ŭciečki hazu z hazavych balonaŭ, to ciapier eksperty śćviardžajuć, što tam ža byli vyjaŭlenyja ślady peraksidu acetonu. Heta rečyva vykarystoŭvałasia bajevikami «Isłamskaj dziaržavy» ŭ jakaści asnovy dla vybuchovych rečyvaŭ pry napadach u Bruseli i Paryžy.
«Maci satany» maje vialikuju vybuchovuju siłu, čaściakom nie vyznačajecca paśla detanacyi i lohka zapalvajecca.
Vyjaŭleńnie padobnaha rečyva dazvoliła palicyi vykazać zdahadku, što terarystyčnaja hrupoŭka mieła namier nie abmiažoŭvacca napadam ŭ Barselonie, a ździejśnić i inšyja, bolš bujnyja terakty.
