president.gov.by
Alaksandr Łukašenka sumniavajecca ŭ nieabchodnaści viartańnia da piacibalnaj sistemy adznak. Pra heta jon zajaviŭ siońnia, adkazvajučy na pytańni piedahohaŭ padčas dyskusii na plenarnym pasiadžeńni Respublikanskaj piedahahičnaj narady, piša BiełTA.
«Rašeńnie treba prymać tady, kali jano naśpieła. Voś jano kryčyć, kažučy słovami paeta. Voś prablema kryčyć. Tak, ja čuju ŭ srodkach masavaj infarmacyi, baču, čytaju, adsočvaju praces. Ale hetaje pytańnie nie maje krytyčnaj masy, jano nie naśpieła dla taho, kab tut prymać niejkija rašeńni», — skazaŭ Alaksandr Łukašenka.
Jon adznačyŭ, što da sistemy adznak staviacca pa-roznamu: starejšaje pakaleńnie pryzvyčaiłasia da piacibalnaj, i ciapier jamu prychodzicca pieravodzić adznaki na stary ład, a moładź užo daŭno navučajecca pa dziesiacibalnaj, i dla jaje tut niama prablem.
«Biaru dziońnik — 9 bałaŭ, a pačynaju pieravodzić na piacibalnuju sistemu: a, heta 4 ź plusam. A nazirajučy za dziciem, ja razumieju, što jon užo ŭ piacibalnuju sistemu nie pieravodzić. Nastaŭniki taksama pryvykli. Ale bolšaść baćkoŭ schilnyja da piacibalnaj: było praściej. Ale sprava ž nie ŭ prastacie, a ŭ efiektyŭnaści. Dumaju, što heta niaznačna ŭpłyvaje na imknieńnie našych dziaciej atrymlivać acenki, — cytuje słovy kiraŭnika krainy kp.by.
Taksama Łukašenka dadaŭ:
— U mianie pierad vačyma svoj prykład. Ja jamu kažu: pačytaj pra sistemy, dyskusija idzie, a jon mnie: ty ŭžo ź dzieviaci hadzin prymusiŭ usich, tabie jašče i piacibalnuju sistemu …
«Tamu z usich punktaŭ, z usich kaardynat, jakija mnie jak prezidentu ŭdajecca atrymać, ja rablu vysnovu, što nam śpiašacca nie treba, treba pahladzieć, dzieści hetuju sistemu strasianuć, kali my bačym niejkija niedachopy. Choć ja asabista prychilnik piacibalnaj sistemy: praściej, zručna, usio zrazumieła. Ale ŭsio-taki ciapier užo, paśla hadoŭ dziejańnia dziesiacibalnaj sistemy, ja adčuvaju, što jana pryžyłasia», — padsumavaŭ Łukašenka.
***
Nahadajem, što pytańnie viartańnia da piacibalnaj sistemy nieadnarazova ŭzdymaŭ na minułym tydni vice-premjer Vasil Žarko.
«Pry dziesiacibalnaj sistemie niama niezdavalniajučych acenak. Ale ž adzinka i dvojka — heta niezdavalniajuča», — skazaŭ Vasil Žarko ŭ intervju prahramie «Hałoŭny efir». Pavodle jaho słoŭ, baćki vučniaŭ narakajuć na toje, što ŭ škole im kažuć pra toje, što nivodnaje dzicia nie moža vučycca na 10 bałaŭ, bo niemahčyma viedać usio i bolš, čym nastaŭnik. Heta niapravilna, miarkuje vice-premjer.
«U raniejšyja časy ŭsio było dakładna: čatyry — heta čatyry, piać — heta piać. A ciapier usio raspłyvista», — adznačyŭ u minułuju niadzielu vice-premjer.
«My prapanavali hramadskaści abmierkavać pytańnie ab viartańni da piacibalnaj sistemy. Mnohija hetuju prapanovu padtrymlivajuć, — dadaŭ Vasil Žarko. — Kali zastaniecca dziesiacibalnaja škała, ja nie piareču. Ale jana pavinna być abjektyŭnaj».
U svaju čarhu ministr adukacyi Ihar Karpienka vykazaŭ mierkavańnie, što hetaje pytańnie [piacibalnaja ci dziesiacibalnaja sistemy] nie prostaje i adnaznačnaje, tamu patrabuje šyrokaha abmierkavańnia, u pieršuju čarhu siarod piedahohaŭ.
