Premjer-ministr Polščy Bieata Šydła zajaviła, što pazicyja Polščy ŭ dačynieńni da biežancaŭ nie źmienicca. Tak jana prakamientavała zajavu Jeŭrakamisii pra namier padać pazoŭ u Sud ES suprać Polščy, Vienhryi i Čechii za admovu prymać biežancaŭ u ramkach prahramy rełakacyi, paviedamlaje Radyjo Polšča.
U efiry telekanała TVP Info kiraŭnik polskaha ŭrada vykazała mierkavańnie, što palityka ES u dačynieńni da mihrantaŭ pamyłkovaja, pa mienšaj miery, pa dźviuch pryčynach: jana stvaraje pahrozu biaśpiecy ŭ Jeŭropie i pieraškadžaje atrymańniu dapamohi tymi, chto ŭ joj sapraŭdy maje patrebu. Na dumku Šydła, u Jeŭropu prybyvajuć u asnoŭnym ekanamičnyja mihranty.
Premjer taksama raskrytykavała adchileńnie Sudom ES skarhi na prymusovy pryjom biežancaŭ, padadzienaj Vienhryjaj i Słavakijaj. Jana miarkuje, što hety krok nie adpaviadaje asnovam ES. Na dumku kiraŭnika polskaha ŭrada, niekatoryja rašeńni i dziejańni Jeŭrakamisii parušajuć pravy krain — siabroŭ ES. «Kali zhadžacca z hetymi rašeńniami, to akažacca, što ES nie budujecca na spraviadlivaści i pavazie pravoŭ dziaržaŭ. Z hetaj pierśpiektyvy možna kazać pra kaniec Jeŭrasajuza», — zajaviła Bieata Šydła.
Ministr zamiežnych spraŭ Polščy Vitald Vaščykoŭski taksama raskrytykavaŭ adchileńnie Sudom ES skarhi Vienhryi i Słavakii. Jon padkreśliŭ, što Polšča nie paddasca cisku Jeŭrasajuza i, u vypadku nieabchodnaści, budzie damahacca pryznańnia svajoj nievinavataści ŭ sudzie. «Što rabić, pryjdziecca abaraniacca. Biaśpieka Polščy važniejšaja za nieabdumanyja rašeńni jeŭrapiejskich orhanaŭ», — zajaviŭ jon.
