Vašynhton śpiašajecca dać Miensku piernik. Na paŭhodu častkova skasavanyja sankcyi suprać "Łakafarby" dy "Škłovałakna". Mahčyma, voś-voś razmaroziać rachunki "Biełnaftachimu".
Na pieršy pohlad, paradaksalna:
Złučanyja Štaty, jakija vyznačalisia bolej žorstkim, čym Eŭraźviaz, padychodam da biełaruskaha pytańnia, zaraz raniej za Brusel robiać kroki nasustrač aficyjnamu Miensku.
Zvyš taho, vonkava sprava vyhladaje tak, što amerykanskija palityki schamianulisia ad prahučałaha dniami paproku Łukašenki: maŭlaŭ, Eŭropa dy Štaty nie śpiašajucca adkazać na našy ščyryja pamknieńni…
Ale nasamreč ničoha dziŭnaha niama. Amerykanskaja "vertykal" maje niesumniennuju pieravahu nad 27-hałovym monstram EZ u sensie hnutkaści zamiežnapalityčnaj taktyki, aperatyŭnaści reakcyi na źmienlivuju abstanoŭku.
Admietnaść ža momantu ŭ tym, što
zaraz, paśla kaŭkaskaj vajny, rezka abvastryłasia baraćba za Biełaruś. "Paŭstałaja z kaleniaŭ" imperyja jość niebiaśpiekaj nia tolki dla Zachadu, ale i dla biełaruskaj kiroŭnaj viarchoŭki.
Maskva vykručvaje ruki (adnačasna spakušajučy drobnymi bonusami), i kožny dzień moža stać vyrašalnym.
Nie vypadkova časovy pavierany ZŠA Mur pachvaliŭ Łukašenku za adfutbolvańnie pytańnia ab pryznańni miaciežnych hruzinskich pravincyj na pasiadžeńnie Rady kalektyŭnaj biaśpieki ADKB. Siońniašni samit, miarkujučy pa ŭsim, abmiažujecca tumannaj deklaracyjaj "ab padziejach na Kaŭkazie", ale ŭ kuluarach (tym bolej što Kreml hulaje na svaim poli) peŭna ž buduć presynhavać biełaruskaha hościa pa poŭnaj prahramie.
Nu a Brusel ad Ameryki adstaje. Prykładna na vosiem dzion :) Nahadaju: emisar dziarždepu Merkieł prylacieŭ u Miensk 21 žniŭnia, nazaŭtra paśla vyzvaleńnia apošnich palitviaźniaŭ, a pasłaniec Eŭrakamisii Minhareli — tolki 29 žniŭnia.
Kali ž surjozna, to Eŭraźviazu, jaki farmalna zakanservavaŭsia na svaich dvanaccaci ŭmovach, varta aperatyŭna, jak toje raić palitolah Vital Silicki, skłaści darožnuju kartu narmalizacyi dačynieńniaŭ ź Biełaruśsiu. Bo siońnia ni ŭłady, ni apazycyja, ni tym bolej paspality lud nie ŭjaŭlajuć sabie kankretnaha naboru eŭrapiejskich piernikaŭ: zrobicie toje i toje — atrymajecie voś heta.
Zastajecca pytańnie ab suadnosinach prahmatyzmu i maralnaści ŭ novych padychodach Zachadu da biełaruskaj prablematyki. Možna zrazumieć zaściarohi tutejšych demakrataŭ, što ich "kinuć". Ale z hledzišča Zachadu, pry ŭsich vysokich słovach pra demakratyju i pravy čałavieka, było b niedarečna zacyklivacca na samaadčuvańni tytulnaj apazycyi ŭ asobna ŭziataj krainie, kali havorka idzie pra vialikaje hieapalityčnaje zmahańnie za sfery ŭpłyvu.
Nam ža varta aceńvać kaliziju najpierš z hledzišča biełaruskaj niezaležnaści. A joj, badaj, bolej zdolnaja zaraz paspryjać mienavita hnutkaść zachodniaj palityki.
U ciažkaj dla našaj krainy sytuacyi Zachad adčyniaje akno mahčymaściaŭ jak alternatyvu rasiejskaj pastcy.
ZY. Nu a voś i Eŭraźviaz zavarušyŭsia :) Ministry zamiežnych spraŭ EZ abmiarkujuć pytańnie ab źmiakčeńni sankcyj u dačynieńni da Biełarusi na niefarmalnym samicie ŭ Avińjonie.
ZZY. Zdajecca, Maskva sapraŭdy niašmat vycisnuła z partneraŭ na samicie ADKB. U deklaracyi, jakuju pracytavaŭ Miadźviedzieŭ, krainy damovy abmiežavalisia kanstatacyjaj taho, što "hłyboka zakłapočanyja" sprobaj Hruzii hvałtam vyrašyć paŭdzionnaasetynskuju prablemu.
ZZZY. Prahnoz nakont taho, što "ŭ kuluarach buduć presynhavać biełaruskaha hościa pa poŭnaj prahramie", musić, spraŭdžvajecca. Miadźviedzieŭ zładziŭ asobnuju sustreču z Łukašenkam.
