Dziakujučy nastojlivaści Nacbanka Biełaruś stanovicca ŭsio bolš technałahičnaj. Nikoha nie ździviš płaciožnym terminałam u viaskovaj kramie i ŭ handlara na rynku. Nastupnyja anansavanyja kroki — stvareńnie kruhłasutkavaj sistemy imhniennych płaciažoŭ, a taksama apłata ŭ kramach mabilnikam.
Pieradavyja krainy śvietu pastupova skaračajuć dolu najaŭnych hrošaj u abarocie. Aryjencir dla mnohich — Skandynavija. Dźvie traciny handlaroŭ Šviecyi miarkujuć, što da 2030 hoda całkam pierastanuć prymać najaŭnyja hrošy. A ŭ Narviehii letaś tolki 7% usich tranzakcyj rabiłasia hatoŭkaj.
Žyć biez kartki ŭ 2017 hodzie — heta abmiažoŭvać siabie i svaje mahčymaści. Dadamo, što niekatoryja banki vypuskajuć ich biaspłatna. Ale kali da kartak mnohija biełarusy pryvykajuć, to płaciažoŭ u internecie mnohija bajacca. Darma! Razam z najbujniejšym anłajn-hipiermarkietam 21vek.by raźviejvajem samyja papularnyja mify.
Mif 1. «U mianie skraduć hrošy z kartki»
Kali vy afarmlajecie pakupku ŭ internecie, vy ŭbačycie śpiecyjalnaje akienca dla ŭvodu piersanalnaj infarmacyi.
Niekatoryja servisy zdymajuć dadatkovuju kamisiju za apłatu praź internet. Ale ŭ lubym vypadku budzie ŭkazana, jakaja kančatkovaja suma śpišacca z vas.
Vam treba paznačyć svajo imia, numar kartki, termin jaje dziejańnia i trochznačny kod na advarotnym baku kartki. U dadatak da taho ŭsio bolš bankaŭ pierachodziać na dadatkovuju pravierku 3D-secure — na mabilnik pryjdzie biaspłatnaja pravieračnaja sms-ka z adnarazovym kodam.
U takoj situacyi skraści hrošy z kartki nadzvyčaj prablematyčna. Nie było nivodnaha vypadku, kab pry apłacie ŭ biełaruskaj internet-kramie chakiery śpisali z vas lišnija srodki.
Zrešty, pry afarmleńni zamovy nieabaviazkova adrazu raźličvacca anłajn. Možna apłacić pakupku pry atrymańni tavara, papiarednie ahledzieŭšy jaho.
Mif 2. «Ja zapłaču, paśla pieradumaju kuplać, a hrošy ž užo nie viernieš!»
Voźmiem prostuju situacyju. Vy zamovili dastaŭku picy i papiarednie apłacili jaje praź internet. Kurjer badziaŭsia nieviadoma dzie i ŭ vyniku pryviez vam chałodnuju picu, dy jašče i nie tuju, što treba. Ničoha strašnaha, admaŭlajciesia ad pakupki. Niachaj kurjer patelefanuje administrataru i admienić płaciež. Budźcie ŭpeŭnienyja, usie hrošy viernucca na kartku.
Inšy prykład. Vy žyviacie asobna ad baćkoŭ, moža, navat u inšym horadzie ci inšaj krainie. U padarunak na dzień naradžeńnia zamovili mamie na lecišča smartfon i kanapu ŭ dadatak. Kurjer pryjechaŭ, ale jana lahła kaśćmi — hamak nie treba! Pa ciapierašnich praviłach handlu, hrošy pavinny viartacca tym ža šlacham, to bok na kartku.
Dadamo, što ŭ surjoznych internet-kramach kurjer moža pryjechać adrazu z terminałam — raźličyciesia pa kartcy na miescy.
Mif 3. «Kuplaju kata ŭ miašku»
Vy dahetul dumajecie, što kali ŭ internet-kramy niama realnaha stacyjanarnaha mahazina, to heta niejkija machlary? Dy nie, heta zvyčajnaja ekanomija na arendzie handlovych płoščaŭ i zarobkach kansultantaŭ. Paradujciesia, što pradaviec nie pierakładzie na vas dadatkovyja vydatki.
U lubym vypadku abirać tavar u cišyni i spakoi na damašnim kampjutary zručniej, čym pad nastojlivyja padkazki kansultanta ŭ realnaj kramie. Dyj virtualny katałoh usio adno bolš poŭny, čym nabor tavaraŭ, vystaŭleny ŭ kramie, — na vitrynu ž usio nie vystaviš.
Mnohija abirajuć «pramiežkavy» varyjant — prychodziać u realnuju kramu, kab uvažliva ahledzieć tavar, a paśla zamaŭlajuć jaho praź internet. Bo tam čaściakom tańniej, i ŭ lubym vypadku bolšy vybar.
Ale navošta chadzić, kali da vas usio adno pryviazuć tavar? Nie zabyvajciesia, što možna admovicca ad pakupki, kali vam nie spadabajecca.
Tavar praviarajecca hetaksama, jak i ŭ stacyjanarnym mahazinie. Albo pry dastaŭcy, albo pry samavyvazie, jaki prapanujuć amal usie bujnyja internet-kramy.
Mif 4. «Kali niama roźnicy, lepš raźličusia najaŭnymi»
Kali vy płacicie najaŭnymi, pa kartcy praz terminał ci praź internet, nadziejnaść absalutna adnolkavaja. Ale peŭnaja roźnica ŭsio ž jość.
My žyviem u čas kankurencyi. Za klijenta zmahajucca nie tolki kramy, ale jašče i banki, i płaciožnyja sistemy.
Usio bolš bankaŭ prapanujuć raźličvacca ich kartkami z mahčymaściu kašbeka. Što heta takoje? Kali vy apłačvajecie tavar peŭnaj kartkaj, to vam u kancy miesiaca budzie viartacca peŭny pracent. Kupili hiraskuter za 420 rubloŭ, atrymali na rachunak 6,3 rubli (zvyčajna kašbek u biełaruskich bankach składaje 1-1,5%). Jakaja-nijakaja, ale vyhada biez dadatkovych strataŭ.
Aproč taho, niekatoryja banki prapanujuć aŭtamatyčnuju rasterminoŭku pry raźliku ich kartkami. Zapłacicie svaje 100 rubloŭ za niekalki miesiacaŭ.
Narešcie, svoj kavałak rynku sprabujuć adchapić i płaciožnyja sistemy (Visa, Mastercard, «Biełkart»). Łavicie akcyi na sajtach internet-kramaŭ, byvaje, što za raźlik patrebnaj kartkaj možna atrymać dadatkovuju źnižku na paru pracentaŭ.
Naprykład, u 21vek.by na niekatoryja tavary skidvajuć canu ažno na 10%, kali raźličvaješsia premijalnaj kartkaj Visa.
Mif 5. «Złamany tavar nie adramantuješ pa harantyi, bo pradaŭca ŭžo nie znojdzieš»
Anłajn-handal vydaje takuju ž harantyju, jak i zvyčajnyja mahaziny. Pry patrebie tavar možna budzie zdać u śpiecyjalizavany servisny centr.
Ale heta opcyja dakładna spracuje tolki kali havorka idzie pra surjoznyja internet-kramy, a nie tyja, što nielehalna zavoziać u Biełaruś «šery» tavar. Moža zdarycca tak, što televizar, pryviezieny kantrabandystam z Polščy ci Litvy, daviadziecca ciahnuć na ramont nazad praź miažu.
Na ŭsialaki vypadak praviercie nazvu internet-kramy i imia jaje zasnavalnika ŭ pošuku — mahčyma, niechta ŭžo papiaredžvaŭ inšych pra niesumlennaha pradaŭca. Niekatoryja machlary majuć dziasiatki fiktyŭnych kampanij. Zakryłasia adna — adkryŭ inšuju. Kali ž harantyjny tałon vypisany takim działkom, to ramantavać tavar daviadziecca za svaje hrošy.
Dla vialikich internet-kramaŭ reputacyja daražejšaja za siekundnuju vyhadu.
