Reuters.com
U Harvardskim univiersitecie ŭ ZŠA prajšła 27-ja štohadovaja cyrymonija ŭručeńnia Šnobieleŭskich premij, jakija prysudžajucca za absurdnyja navukovyja dasiahnieńni. Pra heta paviedamlaje Reuters.
Šnobieleŭskaja premija miru dastałasia hrupie navukoŭcaŭ z Šviejcaryi, jakija dakazali, što pazbavicca ad chrapu dapamahaje hulnia na dydžerydu — muzyčnaj duchavoj pryładzie aŭstralijskich abaryhienaŭ. Pa słovach kiraŭnika hrupy doktara Majła Pjuena ź Ciurychskaha ŭniviersiteta, hulnia na dydžerydu ŭmacoŭvaje vierchnija dychalnyja šlachi.
Premiju pa ekanomicy atrymali Mećju Rakłof i Nensi Hryr z Aŭstralii, jakija vyśvietlili, što hulcy ŭ kazino schilnyja rabić bolš vysokija staŭki paśla taho, jak patrymajuć u rukach krakadziła. Daśledavańni pakazali, što mozh pamyłkova ŭsprymaje niervovaje ŭzbudžeńnie ad blizkaści da niebiaśpiečnaj žyvioły jak sihnał ab šancavańni ŭ hulni.
Šnobieleŭskaja premija ŭ halinie anatomii dastałasia brytancu Džejmsu Chitkoŭtu, jaki vyśvietliŭ, što vušy čałavieka paśla 30 hadoŭ žyćcia pačynajuć pavialičvacca ŭ pamierach prykładna na 2 mm kožnaje dziesiacihodździe.
Uznaharody atrymali francuzskija niejrabijołahi, jakija dakazali, što ŭ mozhu ŭ niekatorych ludziej jość vobłaść, jakaja adkazvaje za ahidu da syru, a taksama italjanskija navukoŭcy, što vyśvietlili, što mnohija identyčnyja dvajniaty nie mohuć adroźnić adzin adnaho na fotazdymkach.
Niekatoryja łaŭreaty atrymali premii za žartoŭnyja daśledavańni. Naprykład, francuzski vučony Mark-Antuan Fardzin byŭ uznaharodžany za toje, što vyśviatlaŭ, ci moža koška adnačasova znachodzicca ŭ vadkim i ćviordym ahrehatnym stanie.
Jaho daśledavańnie hruntavałasia na vykładzienych u internecie fotazdymkach kotak, jakija załazili ŭ viodry i rakaviny.
