Kali ja pračytaŭ hety vierš, sumnievaŭ nie było — jon napisany akurat dla hurtu Akute, niachaj sabie i 90 hod tamu. Mahiloŭski hurt ź vialikaj cikavaściu pastaviŭsia da prapanovy paŭdzielničać u prajekcie «(Nie)rasstralanaja paezija» i ŭpadabaŭ hety tvor Anatola Volnaha. Muzyki ŭbačyli ŭ hetym prajekcie realnuju mahčymaść nahadać pra represavanych litarataraŭ. Chvala represij 30-ch, darečy, kranuła i siamju ŭdzielnika kamandy Romy Žyharava. Roma i Stas Mytnik zrabili pieśniu na vierš paeta ŭ klasyčnym «akutaŭskim» styli, ale jana moža ździvić prychilnikaŭ kamandy. Pavodle jaje možna mierkavać pra saŭnd budučaha albomu kamandy, jaki ciapier rychtujecca. Jość spadzieŭ, što jana taksama pryciahnie ŭvahu da asoby samoha paeta.
Anatol Volny (Ažhirej) — vielmi cikavaja asoba, pavodle žyćcia jakoj možna źniać zachaplalny film. Jon sam pisaŭ u aŭtabijahrafii, što z 14 hod nia byŭ doma — ros u kamsamole, ale — što cikava! — majučy ŭ darobku paemu «Biełaruskaja kamsamolija» i zbornik «Kamsamolskaja nota», jon ličyŭsia «majstram kontrrevalucyjnych anekdotaŭ», pisaŭ parodyi, feljetony i humareski. Mienavita Volny byŭ adnym z zasnavalnikaŭ litaraturnaha abjadnańnia «Maładniak», staŭ adnym z pačynalnikaŭ biełaruskaj pryhodnickaj prozy. Mienavita pa scenaru Anatola Volnaha byŭ źniaty adzin ź pieršych biełaruskich filmaŭ «U ahni narodžanaja» (jaki ŭ prajekcie «Tuzin.Niemaŭla» ahučyć u 2012-m hurt Re1ikt).
Sučaśniki apisvali Volnaha, jak čałavieka pryvabnaha i pryjemnaha ŭ znosinach. Jon mieŭ błakitnyja vočy i śvietłyja vałasy, jakija zavivalisia, chadziŭ u kašuli—kasavarotcy. Jość versija, što pseŭdanim jon pazyčyŭ u kamsamolskaj aktyvistki Soni Fraj, jakoj peŭny čas zachaplaŭsia («fraj» na idyš akurat aznačaje «volny»). Paśla ŭ jaho byli vielmi ciopłyja adnosiny z padpolščycaj Vieraj Charužaj, ale los svoj jon źviazaŭ z Hannaj Kudzielkaj — žonkaju paeta Michasia Čarota, kali zaprasiŭ jaje źniacca ŭ stužcy «Chvoi hamoniać». U 1935-m Volnamu dali zvańnie zasłužanaha dziejača mastactvaŭ BSSR, a praz hod aryštavali ŭ adzin dzień z Valeryjem Marakovym, Michasiom Zareckim i Symonam Baranavych jak udzielnika kontrrevalucyjnaj arhanizacyi. I ŭ adzin dzień z kalehami byŭ rasstralany 29 kastryčnika 1937 hodu… Padrabiaźniej pra Anatola Volnaha ŭ miežach prajektu «(Nie)rasstralanaja paezija» raspavioŭ Anton Rudak.
Nabyć kvitok na kancertnuju prezentacyju prajektu «(Nie)rasstralanaja paezija»
Pieśnia «Ja ciabie pakachaŭ» voźmie ŭdzieł u admysłovym tury aŭdyjočartu na TuzinFM — pieršym u sezonie 2017/2018.
Ŭ marmurovym sniahu
viecier
pieśni
pisaŭ…
Viecier śpieŭ
zavivaŭ
u liłovy
vianok, —
Ja ciabie pakachaŭ,
Ja ciabie pakachaŭ…
Ŭ marmurovym śniahu
viecier
pieśni
pisaŭ…
Ź siniavokich niabios,
ź niesyźmiernaj
hłybi
viecier zorki
zryvaŭ,
ź niepakornaściu nios.
Źniknieš zorkaj i ty…
źniknieš
zorkaj
i ty
ź siniavokich niabios,
ź niesyźmiernaj
hłybi…
