Jeŭrapiejskaja kamisija prapanavała krainam — siabram ES pryniać čarhovyja 50 tysiač biežancaŭ, ale na hety raz na dobraachvotnaj asnovie. Brusiel apublikavaŭ novyja prapanovy pa baraćbie ź mihracyjnym kryzisam, paviedamlaje Radyjo Polšča.
Takim čynam paćviardžajecca nieaficyjnaja infarmacyja ab tym, što Brusiel źmiakčaje svaju pazicyju adnosna prymusovaha pryjomu biežancaŭ dziaržavami-siabrami. Pradstaŭniki JEK pryznajuć, što prahrama pa rełakacyi mihrantaŭ pryniesła vysokija palityčnyja straty, a vyhada była zanadta małaja.
Ciapier Brusiel pakidaje rašeńnie ab pryniaćci mihrantaŭ za krainami — siabrami ES i hatovy vyłučyć na hetuju metu 500 młn jeŭra. Akramia taho, Jeŭrakamisija fakusujecca na lepšaj achovie źniešnich miežaŭ Jeŭrasajuza i na bolš efiektyŭnaj palitycy viartańnia, to bok departacyi asobaŭ, čyje zajavy ab pradastaŭleńni prytułku byli adchilenyja. Jany pavinny być pryniatyja nazad krainami ich pachodžańnia pad pahrozaj spynieńnia finansavańnia prahram dapamohi.
Novyja prapanovy pa baraćbie ź mihracyjnym kryzisam supadajuć z zakančeńniem terminu dvuchhadovaj prahramy pa pieraraźmierkavańni mihrantaŭ. Vosieńniu 2015 hoda było pryniata rašeńnie ab pryniaćci krainami ES 120 tysiač čałaviek. Da ciapierašniaha času było raźmierkavana kala 29 tysiač mihrantaŭ.
Kamisija vyrašyła nie praciahvać hetuju prahramu. Heta aznačaje, što biežancy, jakija prybuduć u Hrecyju abo Italiju z 27 vieraśnia, nie buduć uklučanyja ŭ płan pieraraźmierkavańnia. Takim čynam, pracedury pryniaćcia i razhladu chadajnictvaŭ ab pradastaŭleńni prytułku znoŭ kładucca na plečy ŭładaŭ u Rymie i Afinach.
Jeŭrapiejskaja kamisija padkreśliła, što pa pryčynie mihracyjnaha kryzisu ES u budučyni pavinien admovicca ad «śpiecyjalnych» pracedur i paskoryć pracu nad zakanadaŭstvam ab pradastaŭleńni prytułku. Prajekt, padrychtavany Jeŭrakamisijaj u minułym hodzie, vyklikaŭ sprečki, bo jon mierkavaŭ pastajannaje aŭtamatyčnaje raźmierkavańnie biežancaŭ i štraf za admovu ŭ pamiery 250 tysiač jeŭra za kožnaha niepryniataha mihranta. Ciapier JEK zajaŭlaje, što hatovaja pajści na kampramis.
