U Talinie 29 vieraśnia pačaŭsia samit pa pytańniach ličbavych technałohij, jaki praciahniecca niekalki dzion. Lidary krain ES abmiarkoŭvajuć budučyniu ličbavych technałohij u Jeŭropie, paviedamlaje Radyjo Polšča.
PAP
Haspadynia sustrečy, Estonija, na praciahu hetaha paŭhodździa staršynstvuje ŭ Radzie Jeŭrapiejskaha sajuza. Raźvićcio novych technałohij i abličboŭka ŭvachodziać u šerah pryjarytetaŭ staršynstva Estonii. Premjer-ministr krainy Jury Ratas adznačyŭ, što technałahičnaje raźvićcio kantynienta nieabchodnaje, kali Jeŭropa choča być mocnaj z punktu hledžańnia kankurentazdolnaści ekanomiki:
«My stvarajem ličbavaje hramadstva, i heta naš pryjarytet. Heta značyć, što nam patrebnyja try rečy: adpaviednaja infrastruktura, zakony i adpaviedny padychod».
Jeŭrapiejskija lidary abmiarkoŭvajuć temy kibierbiaśpieki, raźvićcia ličbavaj administracyi i sučasnaj ekanomiki, a taksama vykarystańnia vysokakvalifikavanych supracoŭnikaŭ. Na samicie nie buduć prymacca rašeńni pa kankretnych zakonach, havorka budzie iści, chutčej, pra kirunak źmianieńniaŭ. Estonija spadziajecca na toje, što na samicie buduć vyznačanyja asnoŭnyja ŭstanoŭki, jakija pavinny buduć uvasobicca ŭ žyćcio da 2025 hoda. Samit nosić niefarmalny charaktar, pryniaćcie kankretnych rašeńniaŭ nie praduhledžanaje. U ramkach samitu prachodziać sustrečy z ekśpiertami, navukoŭcami i pradstaŭnikami startapaŭ.
Adnačasova iduć pieramovy pamiž Francyjaj, Hiermanijaj, Ispanijaj i Italijaj z nahody novaj formy padatkaabkładańnia dziejnaści internet-kampanij.
