Šmatdzietnaja siamja Śnihir ź vioski Jasień Asipovickaha rajona atrymała ad Alaksandra Łukašenki karovu Biełku. «Naša Niva» źviazałasia z baćkam, Siarhiejem Śnihirom, i raspytała jaho pra žyćcio i płany.
Siarhieju Śnihiru 26 hadoŭ, jaho žoncy Volzie — 23.
Siarhieju 26 hadoŭ, jaho žoncy Volzie — 23. U siamji ŭžo piaciora dziaciej. Starejšamu 6 hadoŭ, samym małodšym (naradziłasia dvojnia) pa 2.
Siarhiej pracuje miechanizataram na miascovym pradpryjemstvie «Jasień-Ahra», žonka dahladaje dziaciej. Jany naradzilisia ŭ vioscy Jasień, tam ža i zastalisia žyć i pracavać.
Pradpryjemstva, kaža Śnihir, pacichu raźvivajecca: «raniej było nie vielmi, ciapier źmianiŭsia kiraŭnik, stała lepš». Zarobak u Siarhieja — 400—500 rubloŭ. Adnak z usimi «dziciačymi» vypłatami na siamju ź siami čałaviek atrymlivajecca 1400 rubloŭ na miesiac. Narmalna, kaža Siarhiej, ale na karovu ŭsio ž nie naźbiraješ.
«Ź dziećmi adkłaści na karovu ciažkavata. Nam dali parodzistuju karovu, biazrohuju, ja navat nie viedaju, kolki jana kaštuje. A zvyčajnaja karova kaštavała b 1200—1500 rubloŭ», — raskazvaje Siarhiej Śnihir.
Ale karova była patrebnaja, bo dzieciam ciažka biez małaka. I žonka Volha vyrašyła napisać u Administracyju prezidenta list dy paprasić u Łukašenki tuju karovu.
«Žonka vyrašyła sama napisać aby-aby — a raptam daduć? Napisała tydni dva tamu na sajt, ja navat nie viedaŭ pra heta. Daviedaŭsia tolki, kali pryjechała da nas miascovaja administracyja, i žonka pryznałasia, skazała, što dasłała list», — uzhadvaje Siarhiej.
Karova čakaje ciala, jano musić źjavicca bližej da viasny. Sama karova pryjechała da siamji Śnihir užo ź imiem (jaje zavuć Biełka). Jak nazavuć ciala, Siarhiej pakul nie viedaje. Na pytańnie, ci nie choča jon dać jamu imia ŭ honar Łukašenki, Siarhiej žartuje: «Nu, kali «chłopčyk» budzie, to moža i nazaviom Saškam».
Što buduć rabić ź cialom, Śnihir taksama pakul nie vyrašyŭ, ale, najchutčej, addaść jaho ŭ kałhas.
Siarhiej pryznajecca, što siamji b nie pieraškodziŭ jašče vialiki aŭtamabil, «zvazić dziaciej u cyrk, na atrakcyjony». Tym bolš u ideale jon chacieŭ by mieć 6—7 dziaciej.
Ale ŭ najbližejšy čas źviartacca da ŭładaŭ Siarhiej i Volha nie płanujuć.
«Dosyć. I za karovu vialiki dziakuj!» — kaža Siarhiej.
