11 vieraśnia ŭ Muzei historyi biełaruskaha kino była pradstaŭlenaja dla presy novaja televizijnaja karcina «Historyja adnaho horadu».
Dakumentalnaja stužka, pastaŭlenaja na telekanale «Ład» maładoj i talenavitaj tvorčaj hrupaj, raduje vysokim prafesijanalizmam (što vyhladaje cudam na našaje televizii), daścipnaściu i stylova-iraničnymi vynachodkami.
Karcina raspaviadaje pra Miensk na miažy XX stahodździa, a liryčnym hierojem źjaŭlajecca tahačasnaja “akuła piara”, žoŭty žurnalist Darafiej Bochan. Scenarystka Ksienija Łuckina vielmi ŭdała skarystałasia jahonymi zabytymi repartažami, a režyser Andrej Leŭčyk uvasobiŭ historyju – u feeryčnaje vidovišča, stylizavanaje pad niamyja kamedyi.
Historyki – Zachar Šybieka, Ŭładzimier Dzianisaŭ, Ivan Sacukievič – raspaviadajuć pra horad i jahonych žycharoŭ – telehrafistaŭ i prastytutak, aŭtamabilistaŭ i sacyjalistaŭ, sijanistaŭ i terarystaŭ – a za ichnimi śpinami ažyvajuć palicejskija i damy lohkich pavodzinaŭ, chulihany-ravarysty i baradatyja dvorniki, zakachanyja pary i achviary pavodki.
Redkija dakumentalnyja kadry aryhinalna śplatajucca z daścipnymi pastanoŭkami. Stužka – ad pieršych nadpisaŭ da finalnych tytraŭ – vytrymanaja ŭ adzinym styli. I nat ruskaja mova apaviadańnia jość častkaj hetaha stylu, kali my zahłyblajemsia ŭ stohadovaju historyju – i čujem jak što hučała. Aŭtary skazali pa prahladzie, što Miensk byŭ polimoŭnym, i ŭ horadzie pieravažaŭ idyš. Ale ź idyšam – prablema, adnavili toje, što možna.
I adnaŭleńnie hetaje nie suvora-nudnaje i ciažkoje – a lohkaje, iraničnaje i śviežaje, jak pavietra svabody.
Horad – heta ludzi j ichnija kłopaty.
Ciapier talenavityja tvorcy rychtujuć novuju dakumentalnuju stužku – pra Jaŭhieniju Janiščyc.
A premjera «Historyi adnaho horadu» adbudziecca na telekanale “Ład” 13 vieraśnia a 19.15.
Historyja adnaho horadu (Istorija odnoho horoda)
Biełaruś, 2008, čorna-bieły i kalarovy, 27 chv.
Režyser: Andrej Leŭčyk
U filmie zdymalisia: Zachar Šybieka (u roli siabie samoha), Uładzimier Dzianisaŭ (u roli siabie samoha), Ivan Sacukievič (u roli siabie samoha), Uładzimier Mišančuk (hołas za kadram), Vital Kraŭčanka (Darafiej Bochan), Vasil Hračuchin, Alena Stacenka, Alaksandra Bahdanava, Lizavieta Leŭčyk, Uładzimier Bindziukoŭ, Ksienija Łuckina, Maksim Vałodzin, Viktar Suhłob, Stefanija Žukoŭskaja, Anastasija Suruda (haradžanie i haradžanki)
Adznaka 7 (z 10)
Film pradstaŭleny pres-słužbaj Biełteleradyjokampanii
