Usie 19 čałaviek, jakija ŭčora byli zatrymanyja ŭ haradzienskim Centry haradzkoha žyćcia padčas lekcyi Piatra Rabava «Libertarnaja sacyjalnaja dumka apošniaj traciny XX — pačatku XXI ctahodździa» vyzvalenyja z pastarunku, u tym liku i lektar. Prafesar Rabaŭ paviedamiŭ Svabodzie, što jon užo nakiravaŭsia ŭ Baranavičy, dzie siońnia ŭ jaho pryznačana čarhovaja lekcyja.
Piotar Rabaŭ, paśla taho jak vyjšaŭ z pastarunku, sam raskazaŭ žurnalistam, jak adbyvałasia zatrymańnie. Pavodle jaho, jon pryjechaŭ u sajuznuju dziaržavu ź lekcyjaj pa filazofii i navat nia moh padazravać, što publičnaja lekcyja moža stać niesankcyjanavanym masavym mierapryjemstvam.
— A tut ludzi ŭ maskach, pastavili ŭ adzin šerah, chto, adkul, adbitki palcaŭ… Byŭ taki vypusk žurnała «Jerałaš» — «Ništo sabie schadziŭ pa chleb». Voś heta jakraz i adbyłosia. Nas, praŭda, nia bili; byŭ niejki maralny cisk, ale abychodzilisia sa mnoj davoli karektna. Mnie zdajecca, dastatkova taho, što jany sarvali lekcyju, adabrali ŭ mianie knižki. Ja zusim nie ŭjaŭlaju, u čym pryčyna našaha zatrymańnia. My rabili ŭsio heta adkryta, infarmacyja była ŭ internecie. Na maju dumku, ich napałochała słova «anarchija» ŭ maich lekcyjach. U mianie zabrali 11 knižak. Spačatku nas abvinavacili ŭ arhanizacyi niesankcyjanavanaha mitynhu, maŭlaŭ, pravodzili mierapryjemstva biez dazvołu. Dumaju, što mnie ničoha nie pahražaje: ni administracyjnaja, ni kryminalnaja sprava. Maksymum, što ja straciŭ — heta kanfiskavanyja knihi. Ja spadziajusia, što nie paciarpiać ludzi, jakija pryjšli na lekcyju.
Pavodle prafesara Rabava, jon pajedzie ŭ Baranavičy, dzie siońnia ŭ jaho pryznačana čarhovaja lekcyja, i maje nadzieju, što padobnaje ź im nie paŭtorycca.
Usiaho ŭčora ŭ haradzienskim «Centry haradzkoha žyćcia» padčas lekcyi Piatra Rabava było zatrymana 19 čałaviek razam ź lektaram. Siarod zatrymanych byli studenty, mahistranty i vykładčyk.
Usie byli dastaŭlenyja ŭ pastarunak, dzie byli składzienyja pratakoły apytańnia, u zatrymanych uziali adbitki palcaŭ i sfatahrafavali. Dźvie dziaŭčyny admovilisia zdavać adbitki, im pahražali, što pratrymajuć da ranicy, ale vypuścili ŭčora, na paŭhadziny paźniej za astatnich.
Piotar Rabaŭ — sučasny rasiejski anarchist, udzielnik «Aŭtanomnaha dziejańnia». Kandydat filazofskich navuk, dacent katedry filazofii Maskoŭskaha pedahahičnaha dziaržaŭnaha ŭniversytetu imia Lenina. Na jahonaj staroncy «VKontaktie» paviedamlajecca, što jon planavaŭ 9 kastryčnika ŭ Horadni dźvie lekcyi: «Libertarnaja sacyjalnaja dumka apošniaj traciny XX — pačatku XXI st.» i «Niefarmalny ruch sučasnaj Biełarusi (1991- 2010)».
