Kiraŭnik kitajskaha dziaržaŭnaha Kamiteta pa kantroli nad kaštoŭnymi papierami Lu Šyjuj zajaviŭ, što šaściora byłych vysokapastaŭlenych čynoŭnikaŭ płanavali zrušyć lidara Kamunistyčnaj partyi Si Czińpina, paviedamlaje VVS.
Čynoŭniki, imiony jakich nazvaŭ Lu, byli aryštavanyja ŭ ramkach zapuščanaj Si Czińpinam maštabnaj antykarupcyjnaj kampanii.
U pryvatnaści, jon nazvaŭ imia byłoha ministra hramadskaj biaśpieki Kitaja Čžou Junkana, asudžanaha da pažyćciovaha źniavoleńnia ŭ 2015 hodzie.
Taksama siarod nazvanych Lu čynoŭnikaŭ akazaŭsia były kiraŭnik partyjnaj arhanizacyi pramysłovaha centra Čuncyn Bo Siłaj, prysudžany da pažyćciovaha terminu ŭ 2013 hodzie, i były člen Palitbiuro Suń Čžencaj, jaki byŭ zatrymany ŭ lipieni hetaha hoda i straciŭ usie partyjnyja pasty.
Pieraličanyja kiraŭnikom kamiteta čynoŭniki «byli niejmavierna prahnymi i karumpavanymi, jany płanavali zachapić kantrol nad partyjaj i nad dziaržaŭnaj uładaj», zajaviŭ Lu Šyjuj u čaćvier, vystupajučy na pasiadžeńni kamiteta ŭ ramkach XIX źjezda Kamunistyčnaj partyi Kitaja ŭ Piekinie.
Taksama Lu nazvaŭ imiony Lin Czichua, aryštavanaha ŭ 2015 hodzie, pamierłaha u tym ža hodzie hienierała armii Siuja Cajchou, i hienierał-pałkoŭnika Ha Basiuna, asudžanaha da pažyćciovaha źniavoleńnia ŭ minułym hodzie pa abvinavačvańni ŭ chabarnictvie.
Z vystupu Lu nie było jasna, ci kazaŭ jon ab adnoj zmovie, u jakim udzielničali pieraličanyja čynoŭniki, abo ab niekalkich sprobach pieravarotu.
«Si Czińpin spraviŭsia z hetymi prablemami i likvidavaŭ niebiaśpiečnuju tajemnuju pahrozu partyi i krainie», — zajaviŭ Lu.
