Prezident ZŠA vystupiŭ za spynieńnie razdačy vidaŭ na žycharstva praź vizavuju łatareju, paviedamlaje RBK.
U apošnija hady siarod atrymalnikaŭ hryn-kart byli i biełarusy. Našyja suhramadzianie štohod atrymlivali nie mieniej za tysiaču hryn-kartaŭ.
Paśla teraktu ŭ Ńju-Jorku, ździejśnienaha imihrantam z Uźbiekistanu, prezident ZŠA Donald Tramp zajaviŭ pra nieabchodnaść admieny razdačy vidaŭ na žycharstva (hryn-kart) u krainie ŭ ramkach Diversity Visa Lottery Program (DVLP, Dyviersifikacyjnaja łatareja).
Pavodle ŭmovaŭ hetaj prahramy 50 tys. hryn-kart štohod razyhryvajucca siarod tych, chto padaŭ zajaŭki žycharoŭ krain, imihrantaŭ ź jakich u ZŠA pryjazdžaje mała. Mienavita pa vyjhranaj u DVLP hryn-karcie, pa dadzienych amierykanskich ŚMI, i prybyŭ u ZŠA ŭ 2010 hodzie vykanaŭca teraktu — 29-hadovy vychadziec z Uźbiekistana Sajfułło Saipaŭ.
«Teraryst prybyŭ u našu krainu dziakujučy tak zvanaj DVLP. My viadziem ŭpartuju baraćbu za toje, kab prava na imihracyju davałasia na asnovie realnych zasłuh, bolš nijakich łatarej ad demakrataŭ. My pavinny stać NAŠMAT bolš žorstkimi (i razumniejšymi)», — napisaŭ Tramp na svajoj staroncy ŭ Twitter.
«My spynim hetaje varjactva!», — zapeŭniŭ Tramp.
Prahrama DVLP była zapuščanaja ŭ ZŠA ŭ 1990 hodzie i pravodzicca Dziaržaŭnym departamientam. U jaje ramkach štohod razyhryvajecca 50 tys. dazvołaŭ na žycharstva ŭ ZŠA (da 1997 hoda było 55 tys., adnak zatym 5 tys. hryn-kartaŭ z ahulnaj kvoty pieradali ŭ prahramu NACARA, pa jakoj u ZŠA zajazdžajuć hramadzianie Nikarahua i niekatorych inšych krain Centralnaj Amieryki).
Pryniać udzieł u łatarei mohuć hramadzianie ŭsich krain śvietu, za vyklučeńniem tych, ź jakich na praciahu papiarednich piaci hadoŭ u ZŠA imihravać bolš za 50 tys. čałaviek. Pa vynikach hryn-kart łatarei-2015 śpis ščaśliŭčykaŭ uznačalvajuć hramadzianie Kamierunu (5000), Libieryi (5000), Iranu (4992), Niepału (4991), Jehiptu i Efiopii — pa 4988. Biełarusy atrymali tady kala 1200 dazvołaŭ na pierajezd u ZŠA.
Terakt u centry Ńju-Jorku, na Manchetenie, u vyniku jakoha zahinuli vosiem čałaviek, adbyŭsia 31 kastryčnika (u noč na 1 listapada pa minskim časie). Kiroŭca pikapa vyjechaŭ na vieładarožku i źbiŭ ludziej, jakija na joj znachodzilisia, paśla čaho prataraniŭ školny aŭtobus.
Čytajcie:
U Ńju-Jorku uradženiec Uźbiekistana vyjechaŭ na pikapie na vieładarožku i razdušyŭ vosiem čałaviek
