Biełaruski ahratechničny startap OneSoil, jaki pavyšaje praduktyŭnaść sielskaj haspadarki i ekanomić hrošy fiermieraŭ pry dapamozie technałohij mašynnaha navučańnia i kampjutarnaha zroku, atrymaŭ $ 500 tysiač inviestycyj. Jany buduć nakiravany na raspracoŭku biesprecedentnaha dla rynku rašeńnia, paviedamili dev.by u fondzie Haxus, jaki ŭznačaliŭ raŭnd.
Lidaram pasiaŭnoha raŭnda staŭ vienčurny fond Haxus. U raŭndzie taksama brali ŭdzieł pradprymalnik Juryj Mielničak, čyj startap AIMatter hetym letam kupiła Google, i suzasnavalnik EPAM Leanid Łoźnier.
Jak padkreśliŭ Juryj Hurski, suzasnavalnik fondu Haxus, siońnia sielskaja haspadarka — «heta 3 trłn dalaraŭ, hatovych dla inavacyj», z ulikam chutkaha rostu nasielnictva płaniety, źmianieńniaŭ ekałohii i klimatu.
OneSoil — heta razumnaja sistema dla manitorynhu stanu pasiaŭnych płoščaŭ, pavieličeńnia ŭradžajnaści i ekanomii resursaŭ, jakuju raspracavali ŭ 2014 hodzie prahramist Viačasłaŭ Mazaj i hieohraf Usievaład Hienin. Dla zboru «ŭradžaju» dadzienych z paloŭ kamanda vykarystoŭvaje spadarožnikavyja zdymki i zdymku pry dapamozie robata sa svajoj nahi.
Inviestycyi pojduć na raspracoŭku novaha revalucyjnaha rašeńnia, detali jakoha zasnavalniki pakul nie raskryvajuć, adnak abiacajuć niešta biesprecedentnaje dla rynku ŭ najbližejšaj budučyni.
Viačasłaŭ Mazaj, suzasnavalnik i SIEO OneSoil, adznačaje, što čas, nieabchodny dla zboru i analizu dadzienych — asnoŭny barjer dla prychodu ŭ hetuju nišu novych hulcoŭ. Startapu spatrebiłasia 3 hady dla zboru dziasiatkaŭ miljonaŭ punktaŭ dadzienych z paloŭ, stvareńnia ŭłasnych ałharytmaŭ i madelaŭ dla apracoŭki dadzienych, a taksama dvuch zapatentavanych pryład dla zboru dadzienych.
Kamanda OneSoil. Fota: Viačasłaŭ Mazaj
— U Biełarusi siaredni fiermier pierapłačvaje kala $400 tysiač za 10 tysiač hiektaraŭ. Ličba moža stać našmat vyšejšaj dla Zachodniaj Jeŭropy ci Paŭnočnaj Amieryki. Vykarystoŭvajučy dakładnuju sielskuju haspadarku, možna skaracić kala 20% vydatkaŭ. Rašeńni, zasnavanyja na dadzienych, — heta niepaźbiežnaja budučynia sielskaj haspadarki, jakuju my budujem prosta zaraz, — raspaviadaje Usievaład Hienin, suzasnavalnik OneSoil.
Tak, za siezon-2016 startapiery apracavali 55 tysiač hiektaraŭ ziamli i zekanomili dla haspadarak $250 tysiač. Siezon-2017 dla ich jašče praciahvajecca.
