U Hrodnie kiroŭca haradskoha aŭtobusa na vačach u pasažyraŭ skoknuŭ z mosta ŭ raku. Pra heta paviedamiła Hrodzienskaja abłasnaja arhanizacyja Asvoda.
Paviedamleńnie, što ŭ Niomanie apynuŭsia čałaviek, pastupiła na vyratavalnuju stancyju «Centralnaja» siońnia ŭ 14.19. «Tut ža na miesca zdareńnia vyjšaŭ vyratavalny kater. U 14.22 mužčynu dastali z vady ŭ rajonie Kałožskaj carkvy», - adznačyli ŭ Asvodzie.
Mužčyna ŭ niejki momant spyniŭ aŭtobus na moście, adčyniŭ dźviery, vyjšaŭ z sałona, pieralez praz aharodžu i na vačach pasažyraŭ kinuŭsia ŭniz z 20-mietrovaj vyšyni
Viadoma, što jaho zavuć Siarhiej Bartaševič, jamu 57 hadoŭ. Jon zastaŭsia žyvy.
U aŭtaparku kažuć, što mužčyna pracuje tam kala 20 hadoŭ. Prablem raniej anijakich nie było. Ałkaholem kiroŭca taksama «nie zachaplaŭsia».
Bartaševiča vyciahnuli z vady ratavalniki i akazali reanimacyjnuju dapamohu, kab jon pačaŭ dychać. Paśla mužčynu dastavili ŭ balnicu chutkaj dapamohi.
Paśla padzieńnia Bartaševič złamaŭ niekalki rebraŭ. Pakul što jon znachodzicca ŭ reanimacyi. Stan aceńvajecca jak ciažki.
Pryčyny ŭčynku nieviadomyja. Sam Bartaševič ničoha nie kaža prosta tamu, što nie moža — jon znachodzicca pad aparatam štučnaj vientylacyi lohkich, u takim stanie jaho ŭžo dastavili ŭ balnicu.
