Aksana Charoščava.
Čamu zroščvańnie pałavych vusnaŭ — heta nie tak i strašna
Vielmi časta ŭ maleńkich dziaŭčynak vyjaŭlajucca siniechii, kali zrastajucca małyja pałavyja vusny. Pryčyny mohuć być samyja roznyja: alerhii, niapravilnaje charčavańnie ź vialikaj kolkaściu sałodkaha i vuhlavodaŭ.
Jość roznyja padychody ŭ lačeńni siniechii, adnak ja bolš aryjentujusia na zachodniuju miedycynu, dzie ličycca, što nie treba razryvać pałavyja vusny, nie treba traŭmavać maleńkuju dziaŭčynku. Jana budzie raści, u jaje pastupova pačnie raźvivacca žanočaja harmanalnaja sistema, padvysicca ŭzrovień estrahienaŭ, i ŭsio najchutčej projdzie samo. Čapać varta tolki ŭ krytyčnych vypadkach, kali, naprykład, parušajecca močavypuskańnie. Tady pryznačajucca supraćzapalenčyja, harmanalnyja mazi.
Čamu ŭ mnohich dziaŭčynak drenny mazok
Da nas pryvodziać mnohich dziaŭčynak ź nibyta zapalenčymi zachvorvańniami. Kaniečnie, u ich mazok našmat horšy, čym u darosłych žančyn, bo ŭ maleńkich dziaŭčynak paprostu niama harmanalnaj abarony. Piedyjatry pačynajuć panikavać i adrazu prapisvajuć antybakteryjalnyja preparaty, mazi z antybijotykami. Ale časta heta ŭsio nie patrebna, bo pa vyniku tolki škodzić zdaroŭju dziciaci.
Čamu pry zbojach u mienstrualnym cykle nie varta adrazu «siadać» na mocnyja preparaty
Kali ŭ dziaŭčynak školnaha ŭzrostu pačynajecca pałavoje vyśpiavańnie, źjaŭlajucca pieršyja prablemy ź mienstrualnym cykłam. My pravodzim poŭnaje abśledavańnie na harmony, hladzim, ci jość parušeńni abmienu rečyvaŭ. Imkniomsia karektavać: spačatku pryznačajem miakkija, travianyja, hamieapatyčnyja preparaty.
Choć ciapier idzie šmat dyskusij vakoł fitaterapii i hamieapatyi i, kaniečnie, efiekt płaceba nichto nie admianiaŭ, ale pry niaznačnych adchileńniach ja davoli časta vykarystoŭvaju hetyja preparaty i baču vielmi dobryja vyniki. Naturalna, kali parušeńni bolš značnyja, kali jość adchileńni ad harmanalnaj normy, to my pryznačajem karekcyju.
Kali ličycca, što mienstrualny cykł nie ŭ normie
U pieršy hod paśla pieršaj mienstruacyi, pakul rehulatarnyja miechanizmy jašče nie adładžanyja, cykł moža «hulać». Ale kali zboi nazirajucca paźniej, praz dva hady, treba źviartacca da śpiecyjalistaŭ. Zrabić UHD, pravieryć, ci jość schilnaść da ŭtvareńnia kist, jaki harmanalny fon.
Varta chvalavacca i kali paśla 16 hadoŭ niama miesiačnych. Heta vielmi časta tyčacca dziaŭčat, jakija intensiŭna zajmajucca sportam. U ich u harmanalnym fonie moža być usio idealna, a mienstruacyi niama. Časta ŭ takich vypadkach pryznačajucca preparaty harmanalnaj kantracepcyi praź ich lekavyja ułaścivaści. Hetyja srodki vielmi dobra siabie zarekamiendavali ŭ rehulacyi mienstrualnaha cykłu.
Čamu adnaho preziervatyva mała
Pieršyja pałavyja suviazi časta ciahnuć za saboj infiekcyi, što pieradajucca pałavym šlacham. Časam adbyvajecca inficyravańnie virusam papiłomy čałavieka, jaki moža pryvieści da raku šyjki matki. Preziervatyŭ źmianšaje kolkaść infiekcyj, ale jon nie abaraniaje całkam ad infiekcyjnych zachvorvańniaŭ.
Nielha nie źviartać uvahi na hetyja prablemy, bo inakš jany nahadajuć pra siabie praź dziesiać ci piatnaccać hadoŭ, kali dziaŭčyna stanie žančynaj i zachoča stvaryć siamju dy naradzić dzicia. Kali para ciaham hoda rehularna sprabuje zavieści dzicia, ale nie vychodzić, varta źviartacca da daktaroŭ i vyśviatlać mahčymyja pryčyny.
Čamu štodzionnyja prakładki — nie zaŭsiody dobra
Da hiniekołaha treba źviartacca jak tolki zaŭvažyli lubyja prajavy, što vychodziać za miežy zvyčajnaha žyćcia. Navat kali heta prosta nievialiki śvierb, usio adno varta pakazacca doktaru. Śvierb moža być nie tolki pryčynaj małočnicy, ale i bakteryjalnaha vahinoza, dysbakteryjozu pochvy, papiłamatozy, kali vyrastajuć drobnyja papiłomy.
Śvierb moža być banalna vyklikany vykarystańniem štodzionnych prakładak. Ja jak hiniekołah rekamienduju admaŭlacca i ad prakładak na kožny dzień, i ad vilhotnych survetak dla intymnaj hihijeny. Časta prychodziać dziaŭčyny sa skarhami na śvierb i tłumačać, što antybijotyki nie dapamahajuć. My prybirajem prakładki i survetki, i ŭsie prajavy sychodziać.
I heta nie adzinkavyja vypadki, heta sustrakajecca paŭsiudna. Praŭda, va ŭsim patrebny indyvidualny padychod. Niekatoryja žančyny karystajucca hetymi srodkami ŭsio žyćcio, i im cudoŭna. U hetym vypadku ja nie suprać. Inšyja žančyny, u jakich vielmi adčuvalnaja ślizistaja, atrymlivajuć alerhičnuju reakcyju i razdražnieńnie.
Niekalki słovaŭ pra toje, čamu tak adbyvajecca. Pa-pieršaje, hetyja srodki vyrablajucca sa štučnych materyjałaŭ, nie z bavoŭny. Pa-druhoje, kali žančyna vykarystoŭvaje prakładku, jana stvaraje ciopłaje vilhotnaje asiarodździe biez dostupu pavietra. U pałavych šlachach pačynaje raźvivacca vialikaja kolkaść kałonij, hetak zvanych bakteryj anaerobaŭ, jakija, u svaju čarhu, vyklikajuć i bakteryjalny vahinoz, i vydzialeńni ź niepryjemnym pacham, i śvierb pa vyniku.
Čamu nie treba bajacca harmanalnych kantraceptyvaŭ
Siońnia jość mnostva preparataŭ i mahčymaściaŭ kantracepcyi. Preziervatyŭ padychodzić nie ŭsim i nie zaŭsiody. Maładym param zvyčajna padychodzić, ale takaja kantracepcyja nie zaŭsiody im padabajecca.
Inšy sposab — śpiral. Maładym dziaŭčatam, jakija jašče nie naradžali, hetaja kantracepcyja nie pažadanaja, ale pry žadańni my jaje ŭvodzim. Śpiral bolš padychodzić žančynam, jakija ŭžo majuć dzicia.
Davoli pašyranaje harmanalnaje koła i, u pryncypie, dziaŭčatam jano padychodzić. Miechanizm dziejańnia tut taki samy, jak i ŭ aralnych kantraceptyvaŭ.
Inšy sposab kantracepcyi — vahinalnyja hieli i mazi, jakija źniščajuć śpiermatazoidy. Taksama padychodzić maładym dziaŭčatam, adnak ich efiektyŭnaść našmat nižejšaja, čym u aralnych kantraceptyvaŭ.
Ja razumieju, što mnohija bajacca harmanalnych preparataŭ, asabliva kantraceptyvaŭ. Ale nie varta, bo jany vykarystoŭvajucca z 1950-ch hadoŭ i za hety čas šmat razoŭ udaskanalvalisia. Kali raniej jany byli ciažkija dla arhanizma, mieli šmat pabočnych efiektaŭ, to ciapier usio inačaj.
My atrymali nizkadazavanyja cudoŭnyja preparaty, jakija pry pravilnym užyvańni vałodajuć nie tolki vysokim kantraceptyŭnym efiektam, ale i mnohimi lekavymi ŭłaścivaściami. Źnikajuć funkcyjanalnyja kisty, boli pry miesiačnych, idzie prafiłaktyka mijomy, endamietryjozu, kałarektalnaha raku.
Prablemy harmanalnaha płanu, abmienu rečyvaŭ my taksama časta karektujem aralnymi kantraceptyvami.
Fota wmedik.ru.
Čamu mijoma i endamietryjoz — nie kryž
U bolš stałym uzroście ŭ žančyn časta raźvivajecca mijoma matki, endamietryjoz matki, jaječnikaŭ. Heta samyja raspaŭsiudžanyja zachvorvańni, jak i roznyja infiekcyi, što pieradajucca pałavym šlacham.
Na žal, mijoma i endamietryjoz ciapier vyjaŭlajucca i ŭ bolš maładym uzroście, navat u zusim maładych dziaŭčat. My znachodzim hetyja dabrajakasnyja puchliny, ale kali ich vyjavili, pužacca nie treba. Jany amal što nikoli nie pierachodziać u bolš ciažkuju stadyju. Adnak puchlina moža raści, stać pryčynaj nievynošvańnia ciažarnaści, biaspłodździa. Nieabchodna nazirańnie, lačeńnie, svoječasovaja dyjahnostyka.
U žančyn 30-35 hadoŭ mohuć być prablemy i ŭ harmanalnym fonie. Kali jość lišniaja vaha, uźnikajuć parušeńni abmienu rečyvaŭ, parušeńni mienstrualnaha cykłu. Tut my ŭžo hladzim uzrovień cukru ŭ kryvi. Kali jon pavyšany, značyć, jość schilnaść da cukrovaha dyjabietu. Cukroŭka — nie takaja biaskryŭdnaja chvaroba, jana chavaje šmat niebiaśpiek. U pažyłym uzroście parušeńnie vuhlavodnaha abmienu časta ciahnie za saboj i ankałohii.
Kali da hiniekołaha prychodzić žančyna z pavyšanym ciskam, pavyšanym cukram, doktar pavinien naścieražycca, tamu što heta časta spałučajecca z rakam endamietryja, rakam jaječnikaŭ, kołarektalnym rakam i rakam małočnaj załozy. Tamu za fihuraj treba sačyć z maładości, pravilna charčavacca i abmiažoŭvać lohkazasvajalnyja vuhlavody.
Ci mohuć ciažarnaść i rody vylečyć žanočyja chvaroby
Žanočy arhanizm zaprahramavany dla naradžeńnia dziciaci. Kali hetaha nie adbyvajecca, arhanizm pakutuje, pačynajucca pałomki i ŭ harmanalnaj, i ŭ inšych sistemach arhanizmu. Ličycca, što ciažarnaść i rody dobra ŭpłyvajuć na šerah chvarob: heta i mijoma, i endamietryjoz, i mastapacija, i ektapija, to bok erozija šyjki matki.
Najbolš spryjalny ŭzrost dla naradžeńnia pieršaha dziciaci — kala 23 hadoŭ. Adnak dla stvareńnia siamji nieabchodnyja spryjalnyja ekanamičnyja ŭmovy. Tamu i tendencyja ŭ nas idzie da poźniaha naradžeńnia pieršynca.
Ci ŭpłyvajuć na zdaroŭje doŭhija pierapynki ŭ seksualnym žyćci
Heta chutčej pytańnie emacyjnaj śfiery. Mienavita na ŭzroŭni kary hałaŭnoha mozhu dziaŭčyna, žančyna moža adčuvać siabie adzinokaj ci niepatrebnaj. Parušeńni emacyjnaha płanu dziejničajuć na struktury pałavych orhanaŭ, pakolki pałavaja sistema składajecca ź piaci ŭzroŭniaŭ: kara hałaŭnoha mozhu, padkorkavyja struktury, hipofiz, hipatałamus. Jany vydzialajuć tropnyja harmony, jakija ŭpłyvajuć na jaičniki, matku, endamietryj.
Ja liču, što pytańnie lažyć u hetaj śfiery. Kali dziaŭčyna adčuvaje siabie adzinokaj, niepaŭnavartasnaj, pačynajucca roznyja psichałahičnyja prablemy. I heta nie tolki drenna ŭpłyvaje na pałavuju sistemu, ale i na inšyja. Pryčym heta tyčycca jak dziaŭčat, tak i chłopcaŭ.
Ci škodzić zdaroŭju masturbacyja
Raniej, u savieckija časy, masturbacyja była absalutnym tabu, ličyłasia navat, što jana vielmi škodnaja. Adnak pavodle zachodnich mietodyk masturbacyja nie akazvaje nijakaha niehatyŭnaha ŭpłyvu. U niekatorych žančyn vielmi raźvitaja pałavaja kanstytucyja, i ŭ hetym vypadku masturbacyja tolki stanoŭča ŭpłyvaje na arhanizm. Zdymajecca napružańnie, stres, adbyvajecca rassłableńnie. To bok da hetaha treba stavicca narmalna.
Ci možna epilavać bikini
Ciapier mnohija robiać łaziernuju epilacyju zony bikini, i ja stanoŭča da hetaha staŭlusia. Łaziernaja epilacyja, na moj pohlad, samaja biaśpiečnaja, bo nie adbyvajecca inficyravańnia vałasianych falikuł, što moža zdarycca pry haleńni brytvaj. Adnak mnohija kalehi sa mnoj nie zhodnyja. Na ich dumku, praepilavanaja skura ŭ vobłaści pałavych orhanaŭ bolš adčuvalnaja da roznych zapalenčych chvarob. Ličycca, što vałaski na łabku zatrymlivajuć roznyja mikraarhanizmy i nie dajuć mahčymaści trapić im usiaredzinu.
Jak abrać srodki dla intymnaj hihijeny
Ja zaŭsiody rekamienduju žančynam nabyvać śpiecyjalizavanyja srodki dla intymnaj hihijeny ŭ aptecy. Pryčym pavinna być napisana, što, da prykładu, hetaje myła mienavita dla intymnaj hihijeny. Jano budzie mieć niejtralny Ph i dapamoža padtrymlivać kisłaje asiarodździe ŭ pochvie. Zvyčajnaje myła, što pradajecca ŭ kijoskach ci hipiermarkietach, nie padychodzić. Kaniečnie, pry nabyćci treba ŭvažliva čytać skład, paźbiahać tavaraŭ z parabienami. Jeŭropa ŭžo admoviłasia ad ich, a my jašče vykarystoŭvajem parabieny ŭ pramysłovaści.
Jak padtrymać žanočaje zdaroŭje
U cełym — vieści zdarovy ład žyćcia. Pravilna charčavacca, rehularna zajmacca sportam. Zdajecca, banalna, ale nasamreč heta spryjaje narmalnamu harmanalnamu fonu, narmalnamu pastupleńniu vitaminaŭ i pažyŭnych rečyvaŭ. Plus u žančyny budzie zdarovaj nie tolki pałavaja sistema, ale i sardečna-sasudzistaja, niervovaja, kosnaja sistemy. Usio budzie ŭ zdarovym bałansie.
Čytajcie taksama:
Micelarnuju vadu — zmyvać, tonik — mieć abaviazkova. Pamyłki, jakija nie daruje naš tvar
