Žychar Połacka rychtuje terakt? Heta adna z rabočych viersij, jakuju razhladali viciebskija apieratyŭnyja supracoŭniki, razbłytvajučy złačynny kłubok z udziełam hramadzianina Biełarusi. Prychilnik ideałohii teraryzmu, radykalnych isłamisckich hrupovak, jak vyśvietliłasia, vyrablaŭ vybuchoŭku, raspaŭsiudžvaŭ u sacsietkach ekstremisckija materyjały, jakija prapahanduje «Isłamskaja dziaržava», zaklikaŭ pakončyć z «niaviernymi». Na dniach sud pryhavaryŭ pałačanina da 12 hadoŭ kałonii strohaha režymu. Prysud u zakonnuju siłu pakul nie ŭstupiŭ. Ekskluziŭnyja padrabiaznaści hetaj spravy raspavioŭ sb.by načalnik adździeła pa supraćdziejańni ekstremizmu Viciebskaha abłasnoha padraździaleńnia pa baraćbie z arhzłačynnaściu i karupcyjaj MUS Vadzim Taŭpiniec.
Abvinavačanamu 35 hadoŭ. Užo byŭ sudzimy: u 1999-m — za zabojstva z rasčlanieńniem achviary, u 2007-m — za nievykanańnie patrabavańniaŭ previentyŭnaha nahladu (aproč hetaha, vykradaŭ z kramaŭ tavary, niaredka sa svajoj sužycielkaj). Vyzvaliŭšysia, u 2013-m, źjechaŭ u Niamieččynu, dzie taksama zarablaŭ drobnymi kradziažami i taksama traplaŭ u papraŭčyja ŭstanovy. Tam i paznajomiŭsia ź mihrantami z Čačni i Dahiestana, pryniaŭ isłam i staŭ nazyvać siabie Siejfułacham. Novanaviernuty pačaŭ vyznavać radykalnuju formu isłamu, nieciarpimaść da inšych relihij, padtrymlivać ideałohiju terarystyčnaj arhanizacyi «Isłamskaja dziaržava», jaje mietady baraćby z «niaviernymi». Praz sacsietki jon, jak havorycca ŭ materyjałach spravy, «raspaŭsiudžvaŭ aŭdyjavizualnyja, hrafičnyja i tekstavyja prapahandysckija materyjały ID, inšuju relihijna-ekstremisckuju infarmacyju». Adpraŭlaŭ jaje i znajomym u Biełaruś, u tym liku blizkaj siabroŭcy, jakuju taksama dałučyŭ da novaha vieravyznańnia.
Kamu chočacca tryvać takoha typa ŭ svajoj krainie? U 2015-m mužčynu z Hiermanii vypravadzili, dakładniej, departavali na radzimu. U Biełarusi jon praciahnuŭ svaju razburalnuju dziejnaść: vykładvaŭ zabaronienyja materyjały ŭ sietku i zaklikaŭ da akcyj suprać «niaviernych». Jak sa svajoj staronki ŭ sacsietkach, tak i praz mabilnyja miesiendžary. Tady, ułasna, niebiaśpiečny hramadzianin i trapiŭ u pole zroku viciebskich zmaharoŭ z arhzłačynnaściu i karupcyjaj.
Usie prykmiety pakazvali na toje, što čałaviek da niečaha rychtujecca, raspaviadaje padpałkoŭnik milicyi Taŭpiniec:
— Pačali da jaho pryhladacca: čym zajmajecca, čym cikavicca. Akazałasia, čałaviek aktyŭna vyvučaje ŭ sietcy materyjały ab vidach, składzie, sposabach vyrabu samarobnych vybuchovych prystasavańniaŭ. Zatym nam stała viadoma, što jon kupiŭ chimičnyja kampanienty dla vyrabu vybuchovaha prystasavańnia. Instrukcyju-videarolik znajšoŭ u internecie (videarolik jon zachavaŭ na mabilny telefon) i ŭziaŭsia vyrablać vybuchoŭku.
Zachoŭvaŭ jon jaje ŭ svajoj kvatery, pakul tudy 28 kastryčnika 2016 hoda nie nalacieli apieratyŭnyja supracoŭniki HUBAZiK. Niebiaśpiečnaje rečyva znajšli ŭ zdymnym žylli abvinavačanaha, u vannaj. Sioje-toje zachoŭvałasia na bałkonie. Doma ŭ T. vyjavili i inšyja kampanienty samarobnaj bomby. Pa adnoj ź viersij milicyi, zatrymany rychtavaŭ terakt u zamiežnaj dziaržavie, raźličvajučy takim čynam pavysić svoj aŭtarytet pierad budučymi haspadarami ź ID, bo ŭ dalejšym T. płanavaŭ dałučycca da hrupoŭki ŭ Siryi. Źjechać tudy mieŭsia ź siabroŭkaj, praz krainy Jeŭrasajuza (para sprabavała adkryć vizy, ale nie vyjšła) abo Rasieju… Paśla zatrymańnia pałačanin tolki niavinna łypaŭ vačami: nibyta jon suprać vajennych dziejańniaŭ i kryvi, maŭlaŭ, prosta chacieŭ zrabić chłapuški da Novaha hoda.
Taksama vyjaŭlena, što praz sacsietki «Siejfułach» raspaŭsiudžvaŭ videaroliki i fota parnahrafičnaha charaktaru, rassyłaŭ ich inšym karystalnikam.
Apieratyŭnaja zdymka. Fota pradstaŭlena HUBAZiK MUS
