Fota Siarhieja Hudzilina
Niamieččyna nikoli nie staviła datyčna Biełarusi pytańnie, z Uschodam jana ci z Zachadam, i Biełarusi nikoli nie davodziłasia sutykacca z takim vybaram. Dla Rasii zbližeńnie adnosin Biełarusi ź ES nijakich ryzyk nie niasie, zajaviŭ ministr zamiežnych spraŭ Biełarusi Uładzimir Makiej na pres-kanfierencyi ź vice-kancleram Niamieččyny, piša Tut.by.
— Rasija dla nas — hałoŭny stratehičny sajuźnik. U nas nikoli nie było mety razarvać suviazi z Rasijaj, my naadvarot zaŭsiody chacieli ŭmacoŭvać hetyja suviazi. Ale i ź ES adnosiny Biełaruś maje namier raźvivać. I nam nikoli nie davodziłasia sutykacca z takim vybaram — Rasija ci Jeŭropa, — zajaviŭ Makiej.
Ministr adznačyŭ, što na sustrečy prezidenta Łukašenki i vice-kanclera, ministra zamiežnych spraŭ Niamieččyny Zihmara Habryela abmiarkoŭvalisia «asabliva adčuvalnyja dla Jeŭropy» pytańni: raźvićcio demakratyi, pravoŭ čałavieka, śmiarotnaje pakarańnie.
— Nie mahu skazać, na kolki dziasiatkaŭ mietraŭ my zblizilisia, ale važna abmiarkoŭvać hetyja adčuvalnyja temy. I siońnia našy pieramovy byli vielmi źmiastoŭnyja i paŭnavartasnyja. I dumaju, jany dali svoj plon i dazvolili nam lepš razumieć adzin adnaho, - zaŭvažyŭ Makiej.