Ranicaj 28 listapada paśla praciahłaj chvaroby pamierła Ada Siamionaŭna Viarcinskaja — vykładčyca, zasłužany piedahoh Respubliki Biełaruś, paviedamlaje pres-słužba Sajuza biełaruskich piśmieńnikaŭ.
Ada Siamionaŭna — žonka piśmieńnika Anatola Viarcinskaha. Jany byli razam ad 1960 hoda.
U intervju «Narodnaj voli» Anatol Viarcinski kazaŭ: «Z samaha pačatku našaha siamiejnaha žyćcia mnie časam navat niajomka byvała, što žonka robić usio pa domie. U hetym płanie ja prychilnik hiendarnaj roŭnaści. Ale mnie padajecca, što ja moh by rabić. U mianie było zanadta šmat tak zvanaj hramadskaj pracy. Ja byŭ nie tolki paetam, ale i sakratarom Sajuza piśmieńnikaŭ, hałoŭnym redaktaram, deputatam. Naturalna, časta byli pajezdki, sustrečy, imprezy, zastolli… Mnie ŭzhadvajecca, jak ja časam viartaŭsia poźnim viečaram albo nočču dachaty, sadziŭsia na łavačku la padjezda, padymaŭ pozirk na vokny svajoj kvatery i…
u mianie było takoje adčuvańnie, što ja niedaravalna daloka adyšoŭ ad žyćcia za hetymi voknami… Voś pa hetaj pryčynie i liču, što niedadaŭ štości žoncy.
Z druhoha boku, dla ščaślivaha, harmaničnaha, suładnaha žyćcia važnaja jašče takaja reč, jak charaktar i psichałahičnaja sumiaščalnaść. A charaktary ludzi sami nie nabyvajuć — atrymlivajuć ad baćkoŭ. I moj charaktar, pryznacca, moh być lepšym — bolš spakojnym. Ja maju schilnaść da emacyjnych vybuchaŭ, zapalčyvaści, mahu nie zusim adekvatna adreahavać na niejkuju elemientarnuju bytavuju drobiaź»
«Naša viasielle było davoli ścipłaje, adbyłosia ŭ Viciebsku, adkul Ada rodam. Sabrali baćkoŭ, radniu, u asnoŭnym viaskovych ludziej. Za tym časam viasielli nie ładzilisia jak šou…», — zhadvaŭ sp. Anatol.
Ada i Anatol Viarcinskija z synam Jaŭhienam. 1960 hod
U Viarcinskich — troje dziaciej: syn — kardyjołah, da taho ž jon jašče śpiecyjalist pa ultrahukavym daśledavańni. Adna dačka skončyła fakultet radyjofiziki i elektroniki, druhaja vyvučała infarmatyku i prahramavańnie.
