Hienierał baśnijskich charvataŭ Słabadan Pralak padčas razhladu jaho apielacyi ŭ Mižnarodnym trybunale pa byłoj Juhasłavii vypiŭ niešta ź jomistaści, u jakoj, pavodle jaho słoŭ, znachodziłasia atruta. Jak paźniej paviedamiła charvackaje telebačańnie — hienierał pamior, niahledziačy na nieadkładnuju miedyčnuju dapamohu.
Haahski sud razhladaŭ apielacyju Pralaka i jašče piaci baśnijskich charvataŭ na prysud, vyniesieny im u 2013 hodzie. Pralaka tady pryznali vinavatym ŭ vajennych złačynstvach suprać baśnijskich musulman i prysudzili da 20 hadoŭ pazbaŭleńnia voli.
Pačuŭšy, što prysud zastajecca ŭ sile, Pralak ustaŭ i padnios ruku da rota, adkinuŭšy hałavu nazad. Vyhladała heta tak, byccam hienierał vypiŭ ź nievialikaha kielicha niejkuju vadkaść.
Paśla hetaha jon skazaŭ sudździ: «Ja pryniaŭ atrutu». Advakat Pralaka taksama zajaviła, što heta była atruta.
Sudździa nieadkładna abviaściŭ, što pasiadžeńnie prypyniena. Pralaku byli vyklikanyja miedyki.
Raniej trybunał zaćvierdziŭ prysud lidaru baśnijskich charvataŭ Jadranku Prliču — čatyry hady tamu jamu dali 25 hadoŭ.
Prlič i Pralak uvachodzili ŭ kiraŭnictva niepryznanaj respubliki Hiercah-Bosna, jakaja ŭtvaryłasia ŭ 1991 hodzie ŭ vyniku raspadu Juhasłavii i baśnijskaj vajny.
U 2004 hodzie Pralaku i jašče piaci hienierałam byli pradjaŭlenyja abvinavačvańni va ŭdziele ŭ katavańniach i masavych zabojstvach musulman u Bośnii ŭ 1993 hodzie, jany dobraachvotna zdalisia Mižnarodnamu kryminalnamu trybunału pa byłoj Juhasłavii ŭ Haazie.
Da vajny Pralak byŭ hałoŭnym režysioram teatraŭ u Zahrabie i Osijeku. Za čas vajny jon dasłužyŭsia da hienierał-lejtenanta i siabra Rady abarony Charvatyi.