U Turkmienistanie adčuvajecca deficyt asnoŭnych praduktaŭ charčavańnia, paviedamlaje radyjo «Azatłyk» (turkmienskaja słužba «Radyjo Svaboda»).
U Maryjskaj i Achałskaj abłaściach u listapadzie ŭ dva razy padaražeła muka, i hramadzianie pačali skuplać jaje, bajučysia deficytu. Da pačatku śniežnia muki brakavała ŭžo pa ŭsioj krainie, i žychary rehijonaŭ zamaŭlajuć jaje ŭ svaich svajakoŭ i znajomych, jakija jeduć u stalicu.
U vyniku ŭ niekalkich abłaściach krainy cana tannaha chleba vyrasła ŭ paŭtara raza — z adnaho manata (0,28 dalara ZŠA) da 1,4—1,5 manata. U Ašchabadzie chleb ź jakasnaj muki za dva tydni padaražeŭ z dvuch manataŭ da 3,5. U dziaržaŭnych kramach možna kupić nie bolš za kiłahram kurynych kumpiačkoŭ u ruki pa canie vosiem manataŭ (2,3 dalara ZŠA). Biez abmiežavańniaŭ jany pradajucca ŭ pryvatnych handlovych punktach, ale kaštujuć dziesiać manataŭ.
Taksama ŭ Ašchabadzie pačaŭsia deficyt jajek, ich cana vyrasła na 50%. Jak paviedamlaje vydańnie «Chronika Turkmienistana», u ašchabadskich dziaržmahazinach jajki pradajuć tolki darosłym i nie bolš za 30 jajek kožnamu. Za prodažami sočać palicejskija. Jany zabaraniajuć fatahrafavać čerhi i nie puskajuć u ich padletkaŭ.
Žančyna fasuje muku ŭ pakiety
Udvaja vyraśli ceny na harodninu, sadavinu i kandytarskija vyraby, a taksama na dziciačuju vopratku. Padaraželi ŭsie pramysłovyja tavary.
Čynoŭnik ź Ministerstva ŭnutranych spraŭ raspavioŭ «Azatłyk», što rost cenaŭ źviazany z štučna spravakavanym deficytam i łahistyčnymi ciažkaściami. Rehijanalnyja pastaŭščyki adčuvajuć prablemy z zabieśpiačeńniem stalicy praduktami z-za abmiežavańniaŭ na ŭjezd mašyn z abłasnymi numarami.
Napiaredadni Dnia niejtralitetu 12 śniežnia prezident krainy Hurbanhuły Bierdymuchamiedaŭ rasparadziŭsia zabiaśpiečyć u krainie «charčovaje bahaćcie» i padpisaŭ pastanovu ab stvareńni dziaržaŭnaj kamisii pa harantavańni charčovaj biaśpieki. Na fiederalnym telebačańni prablemu deficytu nie aśviatlajuć i raspaviadajuć ab ekanamičnych pośpiechach dziaržavy, adznačaje «Azatłyk».
Vydańnie nahadvaje, što ŭ Turkmienistanie ŭ kancy 2016 hoda taksama z-za niedachopu i padaražeńnia muki pačaŭsia padobny charčovy kryzis.
