Aktrysy Katryn Denioŭ i Inhryd Kavien, i jašče kala 100 viadomych francuzskich pierson raskrytykavali kampaniju #MeToo, nakiravanuju suprać seksualnych damahańniaŭ. U adkrytym liście, apublikavanym u vydańni Le Monde, jany vystupili ŭ abaronu «žyćciova važnaha dla seksualnaj svabody» prava mužčyn zalacacca da žančyn.
Zhvałtavańnie — heta złačynstva. Ale nastojlivaje i niazhrabnaje zalacańnie — heta nie złačynstva. A hałantnaść — heta nie prykmieta ahresiŭnaha mača.
Na dumku aŭtaraŭ lista, sprava amierykanskaha pradziusara Charvi Vajnštejna źviarnuła ŭvahu na prablemu seksualnaha hvałtu ŭ adnosinach da žančyn i złoŭžyvańni mužčynami svajoj uładaj, asabliva na pracoŭnym miescy.
Adnak, na dumku francužanak,
takaja svaboda słova «pieratvarajecca ŭ svaju supraćlehłaść», a tych, chto nie padtrymlivaje kampanii nakštałt #MeToo, aŭtamatyčna ličać saŭdzielnikami złačynstvaŭ.
Čaściakom ludzi, jakija atrymali abvinavačvańni ŭ damahańniach, nie atrymlivajuć prava na adkaz, skazana ŭ zvarocie.
Takaja paśpiešlivaja spraviadlivaść užo pryviała da achviar. Mužčyny vymušanyja sychodzić u adstaŭku, choć jany prosta nie mieli racyi ŭ tym, što chacieli patrymacca za čyjuści kalenku, sprabavali atrymać pacałunak abo pahavaryć na intymnyja temy padčas abiedu na pracy.
Francužanki taksama adznačyli, što ŭzrovień niezaležnaści žančyn nie padvysicca pry padobnym «imknieńni adpravić śviniej na bojniu». Takija nastroi, na dumku aŭtaraŭ lista, słužać tolki tym, chto vystupaje suprać seksualnaj svabody.
Pad cheštehu #MeToo pieršapačatkova abjadnoŭvalisia tyja, chto raspaviadaŭ pra pieražyty seksualny hvałt. Paźniej halivudskija aktrysy zapuścili ruch Time's Up u padtrymku achviar damahańniaŭ.
Časopis Time nazvaŭ piersonaj 2017 hoda ludziej, jakija raspaviadali ab seksualnych damahańniach. Sieryja skandałaŭ pačałasia z rasśledavańniaŭ ab damahańniach z boku Vajnštejna da aktrys i inšych žančyn u Halivudzie.
