27 listapada kryminalnaja sprava «Biełaha lehijona» była kančatkova spynienaja. Ale na Andreja Bialaŭskaha, minskaha mastaka i dyzajniera, u hety dzień zaviali jašče adnu spravu — za zachoŭvańnie zbroi.
Andrej Bialaŭski
Bialaŭski byŭ zatrymany 21 sakavika, prasiadzieŭ u SIZA KDB da 2 červienia. Jaho, jak i astatnich fihurantaŭ spravy patryjotaŭ, vinavacili ŭ padrychtoŭcy da masavych biesparadkaŭ. A pry vobšuku ŭ Bialaŭskaha znajšli bojeprypas — tamu paśla spynieńnia adnoj kryminalnaj spravy jon staŭ fihurantam inšaj. Ciapier Bialaŭskamu pahražaje da 7 hadoŭ pazbaŭleńnia voli.
Ranicaj 11 studzienia razhlad spravy pačaŭsia ŭ sudzie Leninskaha rajona Minska. Sudździa - Maryna Zapaśnik.
Andrej Bialaŭski na sudzie
Paśla taho, jak prakuror začytaŭ abvinavačvańnie, sudździa spytała ŭ Bialaŭskaha ci pryznaje jon vinu. Toj adkazaŭ, što vinu pryznaje całkam.
«Uletku 2013 hoda ja nabyŭ mašynu «Džyp Hrand Čeroki» ŭ Rečycy. Patron znajšoŭ praź niekalki tydniaŭ u aŭtamabili, pad zadnim siadzieńniem, — patłumačyŭ u pakazańniach Bialaŭski. — Nu ja i vyrašyŭ pakinuć jaho jak suvienir. Ja nie viedaŭ, bajavy toj patron ci nie».
Pa słovach Bialaŭskaha, patron jon zakinuŭ u stoł. Tam toj i lažaŭ da sakavika 2017 hoda — kali jaho znajšli pry vobšuku supracoŭniki KDB.
Uvohule, pasiadžeńnie išło chutka. Vysłuchali prakurora, samoha Bialaŭskaha, razhledzieli piśmovyja materyjały spravy. Taksama ŭ jakaści śviedki sud vyklikaŭ maci Bialaŭskaha, ale jana admoviłasia ad dačy pakazańniaŭ.
Sudździa Zapaśnik prahartała charaktarystyku na Bialaŭskaha ad učastkovaha («charaktaryzujecca zadavalniajuča, prablem nie było»), adznačyła, što akramia parušeńniaŭ PDR, prablem z zakonam u abvinavačanaha nie było: na ŭlikach jon nie staić, sudzimy nie byŭ.
Usio zaniało 30 chvilin. Paśla sudździa abvieściła pierapynak - paśla abiedu pačnucca sudovyja sprečki.
