Hieapalityčny vybar režymam Łukašenki byŭ zrobleny jašče ŭ zarodku. Pa svajoj pryrodzie, idealohii i palitycy – heta prarasiejski režym. Maskva jaho stvaryła. Jana ž padtrymlivaje hety jahony rasiejski “vybar” miljardnymi kredytami (vyhadnymi Maskvie). Jana ž pryviazała jaho da svajoj haza-naftavaj truby i da svajoj vajennaj mašyny. Jana ž pakrokava zahaniaje jaho ŭ svaju stara-novuju heboŭskuju imperyju.
Vajenny napad Rasiei na Hruziju razbudziŭ, narešcie, Zachad ad ružovaje śpiački. Zdajecca, jany ŭžo pačali razumieć, što dyplamatyčny peryjad novaha heboŭskaha rajchu skončyŭsia i pačaŭsia adkryty etap čarhovaha pieradziełu śvietu. Matyvy, matyvacyja, dziejańni i schiema dakładna supadajuć z pavodzinami hitleraŭskaha rajchu ŭ 1930-ch.
U hetaj sytuacyi ŭsie ŭ Eŭropie adčuli niebiaśpieku. U tym liku i pramaskoŭski režym Łukašenki zrazumieŭ pahrozu svajmu aŭtanomnamu isnavańniu. Režym, jaki vastryŭ avanturnyja ambicyi na zachop ułady ŭ Rasiei, nia choča, kab jaho hetaja Rasieja prakaŭtnuła ciapier, jak zajca ŭdaŭ. Eŭraźviaz, bačačy takoje, nia choča heboŭskaha rajcha i rasiejskich rakietaŭ za Buham. Smažany pievień dziubnuŭ, narešcie, usich. Pieramovy i zbližeńnie režymu z Eŭraźviazam zakanamierna vynikali z abstavinaŭ – i jany pačalisia. Heta dało padstavu šmat kamu havaryć pra “hieapalityčny vybar” režymu (jaki my pišam tolki ŭ dvukośsi) i byccam by pavarot jahony na Zachad.
Hetaj frazealohii ab darozie ŭ Eŭropu, akazvajecca, chapiła šmat jakomu našamu biełarusu, kab duša jaho ŭschvalovana zatrymcieła. Jon užo dumaje, što Łukašenka (hety nienavisny jamu Łukašenka) pojdzie, narešcie, na Zachad, i nichto nie pahonić usich u Rasieju.
Mušu, adnak, u čarhovy raz mocna rasčaravać hetych ludziej i ichniaje mifalahičnaje dumańnie. Łukašenka i pramaskoŭski režym nia pojduć na Zachad, i navat nie paviernucca da jaho tvaram. Choć zruchi i dačynieńni pačnucca, ale hieapalityčnyja pieravybary nie adbuducca. Heta vidavočna dla ŭsich, chto ŭmieje choć zbolšaha analizavać, choć troški ŭjaŭlaje sytuacyju i viedaje Łukašenku. Dalej za taktyku balansavańnia (“dva kryły”) režym nie pasuniecca.
Zbližeńnie z Eŭraźviazam – heta ŭsiaho tolki taktyka, jakaja ŭ realnaści ŭ luby momant moža być spynienaja i navat pieratvoranaja ŭ svaju suproćlehłaść. Režymny handlar choča kupić kania za mylnyja burbałki.
Dla biełarusaŭ u hetaj sytuacyi niepryznańnie falšyvych vybaraŭ jość važniejšaje, čym usie manipulacyi režymu z Eŭraźviazam. Realny pavarot režymu da Eŭropy musiŭ by adbyvacca na inšych umovach.
Biełaruś u jaje sučasnym stanie moža lohka stać raźmiennaj manietaj pamiž Rasiejaj i Zachadam.
U hieapalityčnych dačynieńniach pamiž imperyjami i blokami pastajanna ŭźnikajuć vialikija i maleńkija pakty dy pakciki “Rybientropa-Mołatava”. Da takoj palityki treba być padrychtavanymi, kab nia stacca achviaraj. Jaje možna pradbačyć, ale nielha lahična sprahnazavać, bo vielmi roznyja padychody ŭklučanyja ŭ dziejańnie. Adsutnaść pryncypaŭ, prystojnaści i marali nie pieraškadžaje Eŭropie prytrymlivacca ahulnych praviłaŭ. Rasieja, tym časam, usio robić i aceńvaje tolki pa svaich ”čynhizchanaŭskich” praviłach (dakładniej, pa paniaćciach), a Łukašenka ŭvohule nie trymajecca nijakich praviłaŭ. Tolki vielmi naiŭnyja i dalokija ad rečaisnaści ludzi mohuć dumać, što režym Łukašenki tut dziejničaje ŭ adzinočku i namiervajecca zrabić niejki “hieapalityčny” zachodni vybar, što, u pryncypie, dla jaho niemahčyma.
Realna dapuścić, što palityka režymu budzie balansavać pamiž Rasiejaj i Eŭraźviazam. Režym deklaruje heta, i my bačym peŭnyja jaho zachady. U pryncypie, taki stan byŭ by bolš zručny dla našaj pryhniečanaj ciapier nacyi, čym adnabokaja skiravanaść režymu na Ŭschod. Ale ŭsia sprava ŭ tym, što zachodnija zruchi režymu, akazvajecca, ščylna kantralujucca ŭschodnim nadziralnikam.
Pytańnie -- pryznaje, ci nie pryznaje Eŭropa falšyvyja vybary ŭ Biełarusi, -- raźmierkavałasia, na moj pohlad, užo ciapier, kateharyčna nie na karyść pryznańnia. Jak by ni kruciłasia Eŭropa, ale ŭ hetych abstavinach razumna abhruntavać pryznańnie, navat mocna skryviŭšy dušoj, ŭžo niemahčyma, nia straciŭšy svajho tvaru. (U niekatorych miescach “papiarednie” prymusili prahałasavać 93 adsotki vybarcaŭ, a ŭ cełym pa Biełarusi – 30 adsotkaŭ. Heta jość padrychtoŭka maštabnaj falsyfikacyi, jakuju ŭžo nie abvierhnieš.)
Pry najhoršym vyniku (falsyfikacyja i pryznańnie demakratyčnaści niedemakratyčnych vybaraŭ Eŭropaj) biełarusy nie pavinny pryznavać falšyvyja vybary i falšyvuju “pałatu”. Nieabchodna budzie heta raznastajna zaśviedčyć. U tym liku, na specyjalnym forumie usich vybarščykaŭ i arhanizacyjaŭ, što ŭdzielničali (ci śviadoma nia ŭdzielničali) u vybarach. Biełaruskaje hramadztva pavinna b było ŭśviadomić novuju sytuacyju ŭ mižnarodnaj palitycy i musiła b źviarnucca da abjadnańnia vakoł nacyjanalnaj idei, musiła b padtrymlivać biełaruskuju vyzvolnuju palityku i biełaruskaje nacyjanalnaje Adradžeńnie, asabliva - inicyjatyvu “Biełaruskaja Salidarnaść”.
Miarkuju, što vopyt hetych vybaraŭ (pry lubym vyniku i lubym zychodzie) pavinien dać biełarusam mocny šturšok dla asensavańnia narodnaha losu, prychilić mnohich da kalektyŭnych dziejańniaŭ dziela nacyjanalnaj budučyni, voli i ščaścia Biełarusi.
