Ad pačatku 1918 hoda ŭ biełaruskim ruchu isnavali i sapierničali dźvie płyni — «biełnackamaŭcy» i «beneeraŭcy».
Ab hetym paviedamiŭ staršynia Pastajannaj kamisii pa adukacyi, kultury i navucy Pałaty pradstaŭnikoŭ Nacyjanalnaha schodu, člen-karespandent NAN Biełarusi, doktar histaryčnych navuk Ihar Marzaluk padčas kruhłaha stała «1918-y dla Našaj dziaržaŭnaści: nabytki i straty», jaki prajšoŭ u redakcyi haziety «Źviazda».
«Nielha tolki stvaralnikaŭ BNR ličyć pravapierajemnikami idej 1-ha Usiebiełaruskaha źjezda. Bolš taho, demakratyčnaha mandata i lehitymnaj pravapierajemnaści z Usiebiełaruskim źjezdam Rada BNR nasamreč nie mieła, bo Usiebiełaruski źjezd nikoli patrabavańniaŭ niezaležnaści nie ahučvaŭ. Lehitymnym pierajemnikam i pradaŭžalnikam idej Usiebiełaruskaha źjezda byŭ Biełnackam. Tak, źjezd razahnali balšaviki Zachodniaha frontu, bo nie žadali dzialicca ŭładaj z pradstaŭnikami biełaruskaha narodu. Ale ž źjezd zdoleŭ adbycca i być takim pradstaŭničym mienavita tamu, što balšavickaje centralnaje kiraŭnictva, a dakładniej — asabista Lenin i Stalin, padtrymała jaho praviadzieńnie» — zajaviŭ deputat.
Jon nahadaŭ, što delehaty pryniali rezalucyju, u jakoj pryznajuć Savieckuju ŭładu.
«Delehaty pryniali rašeńnie ab ustalavańni ŭ Biełarusi respublikanskaha ładu, pryznavali centralny ŭrad i nie pryznavali Abłvykamzach jak strukturu frantavoha pachodžańnia. Razhon źjezdu byŭ samavolstvam Miaśnikova, Knoryna i Łandera» — padkreśliŭ Ihar Marzaluk. — Ich pazicyju rezka raskrytykavali ŭ Pietrahradzie, zapatrabavali pravieści novy źjezd. Naturalna, što krytyka hetaja zychodziła z padačy tych biełaruskich dziejačaŭ, jakija sami byli ŭdzielnikami Usiebiełaruskaha źjezda. U Narodnym kamisaryjacie pa spravach nacyjanalnaściaŭ, jakim kiravaŭ Stalin, 31 studzienia 1918 hoda, pavodle dekreta Lenina, stvaryli ŭ Pietrahradzie Biełaruski nacyjanalny kamisaryjat.
Mienavita hety orhan adyhraŭ vyklučnuju rolu ŭ stvareńni biełaruskaj savieckaj dziaržaŭnaści».
Takim čynam, pa słovach prafiesara, ad pačatku 1918 hoda ŭ biełaruskim ruchu isnavali i sapierničali dźvie płyni — «biełnackamaŭcy» i «beneeraŭcy».
«Kožnaja z hetych płyniaŭ admaŭlała inšuju, abvinavačvajučy ŭ zdradzie biełaruskaj spravie i biełaruskamu narodu.
Abjektyŭna ž — i tyja, i druhija pracavali na karyść Biełarusi, imknulisia da stvareńnia biełaruskaj dziaržaŭnaści.
Darečy, i tyja, i druhija byli pradstaŭnikami roznych partyj sacyjalistyčnaha kirunku» — zajaviŭ Ihar Marzaluk.
