«Naša Niva» padčas pramoj telefonnaj linii zadała pytańnie namieśniku ministra ŭnutranych spraŭ, kamandujučamu ŭnutranymi vojskami Juryju Karajevu.
«Jak va Unutranych vojskach naładžana sistema patryjatyčnaha vychavańnia sałdat i jakaja rola advodzicca biełaruskaj movie?» — spytalisia my.
Juryj Chadžymuratavič Karajeŭ — kamandujučy Unutranymi vojskami.
«Ideałahičnaja rabota pracinaje ŭsie śfiery žyćcia žaŭnieraŭ, pačynajučy ad pachodu u stałovuju i da zaniatkaŭ pa bajavoj padrychtoŭcy: skažam, što kali jon stralaje z aŭtamata ci adpracoŭvaje pryjomy rukapašnaha boju, to jon heta robić kab abaranić Radzimu, niezaležnaść i terytaryjalnuju cełasnacć, a nie kab navučycca stralać i bicca dziela zabavy — pra heta havorycca i naŭprost, i ŭskosna», — patłumačyŭ Karajeŭ.
Pa jaho słovach, dla tych, chto słužyć va ŭnutranych vojskach, jość śpiecyjalny pradmiet — ideałahičnaja padrychtoŭka. «Davodzim da ładu ŭsie viedy pa historyi i hieahrafii Biełarusi: vobłaści, harady, stalicy VKŁ — u jakija časy dzie što było. Kali škoła dapuściła prabieły ŭ vyvučeńni historyi, to my ich vypraŭlajem. Bo bieź viedańnia historyi svajoj krainy ideałohii i patryjatyzmu być nie moža, ułasna», — zapeŭnivaje jon.
«Taksama u biblijatekach padborka litaratury pa-biełarusku: i vieršy, i proza, ale my nie naviazvajem, na jakoj movie čytać i što, — praciahvaje Karajeŭ. — My tłumačym, što ŭsio, čym zajmajemsia, maje na mecie abaronu kanstytucyjnaha ładu, vychavańnie patryjatyzmu i lubovi da našaj ziamli, maci, Radzimy. Zaŭždy tłumačym, što my — heta abarona hramadzian, a nie karny mieč revalucyi, jak heta raniej pra orhany VČK-NKVD kazali».
